Дар мизи мудаввар Дилрабо Мансурӣ, муовини Сарвазири Ҷумҳурии Тоҷикистон, Фарҳод Раҳимӣ, Раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон, Шералӣ Кабир, вазири саноат ва технологияҳои нави Ҷумҳурии Тоҷикистон, Лутфия Абдулхолиқзода, муовини вазири маориф ва илми Ҷумҳурии Тоҷикистон ва намояндагони вазоратҳои рушди иқтисод, меҳнат муҳоҷират ва шуғли аҳолӣ, кишоварзӣ, кумитаҳои меъморӣ ва сохтмонӣ, рушди сайёҳӣ ва намояндагони ташкилоту созмонҳои байналмилалӣ, ки дар Тоҷикистон фаъолият доранд, инчунин корхонаву ширкатҳои хусусии ватанӣ иштирок ва суханронӣ намуданд.

Чорабиниро Фарҳод Раҳимӣ ифтитоҳ намуда, иброз доштанд, ки мизи мудаввар дар асоси дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ ва Қонуни Ҷумҳурии Тоҷикистон “Дар бораи тайёр намудани мутахассисон бо назардошти талаботи бозори меҳнат” доир гардид. Маврид ба зикри хос аст, ки Қонуни Ҷумҳурии Тоҷикистон “Дар бораи тайёр намудани мутахассисон бо назардошти талаботи бозори меҳнат” асосҳои ҳуқуқӣ, молиявӣ ва ташкилии ҳамкории давлат ва бахши хусусиро дар низоми таҳсилоти касбӣ муайян намуда, муносибатҳои раванди ҳамкории низоми таҳсилоти касбиро дар тайёр намудани мутахассисони ҷавобгӯ ба талаботи бозори меҳнат танзим менамояд.

Зимни баргузории мизи мудаввар самту ихтисосҳое, ки дар муассисаҳои таҳсилоти ибтидоӣ ва миёнаи касбии Кумита омода карда мешаванд, масъалаҳои талаботу эҳтиёҷоти вазорату идораҳо ва корфармоён ба мутахассисони дорои таҳсилоти ибтидоӣ ва миёнаи касбӣ муаррифӣ гардид. 

Тибқи таҳлилҳо тӯли 5 соли охир хатмкунандагони муассисаҳои таҳсилоти ибтидоӣ ва миёнаи касбии ҳамагӣ 13 дарсад бо ҷои кор таъмин гаштаанд. Ҳарчанд ҳамкорӣ миёни идораву корхонаҳои гуногун ба хатмкунандагони муассиаҳои мо бад нест, масъалаи бо кор таъмин намудани хатмкунандагон яке аз мушкилотҳои асосӣ буда, ҳанӯз ҳалли пурраи худро наёфтааст. Мо асосан хатмкунандагони гурӯҳҳои буҷавиро ба корхонаҳои давлатӣ бо роҳхат ба кор мефиристем. Дар ин самт мушкилоти ҳалталаб зиёданд. Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон чораҳои мушаххас андешида истодааст, ки робитаро бо вазорату идораҳо ва корхонаҳои истеҳсолӣ дар шакли сифатан нав ба роҳ монда, вазъи бо кор таъмин кардани хатмкунандагонро беҳтар намояд.

Бо мақсади беҳтар намудани раванди таълиму тарбия дар муассисаҳои таҳсилоти ибтидоӣ ва миёнаи касбӣ ва соҳибкасб гардидани шаҳрвандон бо қарори Ҳукумати Ҷумҳурии Тоҷикистон аз 6 сентябри соли 2023, №429 Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон таъсис дода шуд. Айни замон, дар назди Кумитаи мазкур 63 муассисаи таҳсилоти ибтидоии касбӣ ва 87 муассисаи таҳсилоти миёнаи касбӣ (58 муассисаи давлатӣ ва 29 муассисаи ғайридавлатӣ) ва 5 филиал (1 давлатӣ ва 4 ғайридавлатӣ) фаъолият менамоянд, ки дар онҳо аз рўйи зиёда аз 500 ихтисос мутахассисон омода мегарданд.

Дилрабо Мансурӣ, муовини Сарвазири Ҷумҳурии Тоҷикистон зимни суханронии худ таъкид намуданд, ки Ҳукумати Ҷумҳурии Тоҷикистон хусусан Пешвои миллат, муҳтарам Эмомалӣ Раҳмон соҳаи таҳсилоти ибтидоӣ ва миёнаи касбиро яке аз самтҳои афзалиятноки кишвар маҳсуб дониста, мунтазам барои рушду нумуи он тадбирҳои судманд андешида мешавад. Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни суханронӣ дар Паёми навбатиашон «Дар бораи самтҳои асосии сиёсати дохилӣ ва хориҷии ҷумҳурӣ» (28 декабри соли 2023) бори дигар ба ин нукта ишора карда, зикр намуданд, ки «Рушди илму маориф калиди пешрафти ҳамаи соҳаҳо ва омили муҳимтарини таъмин намудани ояндаи босуботи давлат ва фардои босаодати ҷомеа ба ҳисоб меравад».

Дар ҷараён доир ба ҳадафу вазифаҳои Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон маълумот дода шуд. Гуфта шуд, ки Кумита аз давраи таъсис то имрӯз бо беш аз 15 ташкилоту муассисаҳои байналмилалӣ,ки дар ҷумҳурӣ фаъолият доранд, ҳамкориро ба роҳ монда, бо як қисми онҳо Ёддошти тафоҳум ба имзо расидааст.

Қайд гардид, Муассисаҳои таҳсилоти ибтидоӣ ва миёнаи касбиро зарур аст, то бо намояндагони асосии тиҷорат, бахши хусусӣ ва ҷомеаи байналмилалӣ ҳамкории устувор барқарор намуда, рушди малакаҳои ба бозори мувофиқро барои қонеъ кардани талаботи бозори меҳнат ба барномаҳои таълимӣ ворид намуда, ҳамин тариқ, мувофиқати амалӣ ва баланд бардоштани сифати таҳсилотро таъмин намоянд.

Ҳамчунин иброз шуд, ки Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон талош меварзад, барномаҳои таълимӣ ва курсҳоро тавассути ҷорӣ намудани технологияҳои нав ва усулҳои пешрафтаи омӯзиш такмил дода, имконияти бо кор таъмин шудани хатмкунандагонро афзоиш диҳад. Ҳамзамон, маъракаҳои тарғиботӣ, иттилоотӣ ва маърифатиро пайваста амалӣ созад, то ҷомеа аҳамияти таҳсилоти касбиро барои рушди устувори иқтисодии Тоҷикистон беҳтар дарк намояд.

Дар дар идома мавзуҳои “Муаррифии Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон;” “муаррифии самту ихтисосҳое, ки дар муассисаҳои таҳсилоти ибтидоӣ ва миёнаи касбии Кумита омода карда мешаванд;” “Баррасии талаботу эҳтиёҷоти вазорату идораҳо ва корфармоён ба мутахассисони дорои таҳсилоти ибтидоӣ ва миёнаи касбӣ;” таҳлилу баррасӣ шуданд.

Дар ҷамъбасти мизи мудаввар роҳбарони муассисаҳои таҳсилоти ибтидоӣ ва миёнаи касбӣ ихтисосу касбҳои худро муаррифӣ намуданд. Роҳбарони ташкилоту муассисаҳои ватанию хориҷӣ, ки дар мизи мудаввар иштирок доштанд, талаботҳои худро ба роҳбарони муассисаҳо ҷиҳати омода намудани мутахассисони соҳибкасб иброз доштанд.