1.       Сармутахассиси шуъбаи банақшагирии молиявии Раёсати молия, банақшагирӣ ва муҳосибот – 1 ҷой, маоши мансабӣ 2641, 00 сомонӣ.

2.       Мутахассиси пешбари шуъбаи банақшагирии молиявии Раёсати молия, банақшагирӣ ва муҳосибот – 1 ҷой, маоши мансабӣ 2154, 50 сомонӣ.

3.       Мутахассиси пешбари шуъбаи баҳисобгирии муҳосибавии Раёсати молия, банақшагирӣ ва муҳосибот – 1 ҷой, маоши мансабӣ 2154, 50 сомонӣ.

4.       Мутахассиси шуъбаи банақшагирии молиявии Раёсати молия, банақшагирӣ ва муҳосибот – 1 ҷой, маоши мансабӣ 1779, 20 сомонӣ.

5.       Мутахассиси шуъбаи баҳисобгирии муҳосибавии Раёсати молия, банақшагирӣ ва муҳосибот – 1 ҷой, маоши мансабӣ 1779, 20 сомонӣ.

6.       Сармутахассиси шуъбаи ҳуқуқ, коргузорӣ ва назорат – 1 ҷой, маоши мансабӣ 2641, 00 сомонӣ.

7.       Мутахассиси пешбари шуъбаи кадрҳо, котибот ва корҳои махсус – 1 ҷой, маоши мансабӣ 2154, 50 сомонӣ.

8.       Мутахассиси пешбари Раёсати таҳсилоти миёнаи касбӣ – 1 ҷой, маоши мансабӣ 2154, 50 сомонӣ.

9.       Мутахассиси Раёсати таҳсилоти ибтидоии касбӣ – 1 ҷой, маоши мансабӣ 1779, 20 сомонӣ.

10.   Мутахассиси пешбари шуъбаи муносибатҳои байналмилалӣ ва робита бо ҷомеа – 1 ҷой, маоши мансабӣ 2154, 50 сомонӣ.

11.   Мутахассиси шуъбаи муносибатҳои байналмилалӣ ва робита бо ҷомеа – 1 ҷой, маоши мансабӣ 1779, 20 сомонӣ.

Барои иштирок дар озмун ҳуҷҷатҳои зерин пешниҳод карда мешаванд:

- ариза ба унвони роҳбари мақомоти давлатӣ;

- варақаи шахсии баҳисобгирии кадрҳо;

- тарҷумаи ҳол;

- нусхаи шиноснома;

- нусхаи ҳуҷҷатҳо дар бораи таҳсилот (диплом);

- 6 дона расм (4 дона андозаи 3х4 ва 2 дона андозаи 4х6);

- нусхаи дафтарчаи меҳнатӣ (барои онҳое, ки фаъолият мекунанд);

- маълумотнома оид ба вазъи саломатӣ дар шакли 038;

- маълумотнома оид ба надоштани доғи судӣ;

- маълумот дар бораи даромад ва вазъи молу мулк (Эъломия);

- нусхаи гувоҳномаи рақами мушаххаси андозсупоранда (РМА);

- нусхаи гувоҳномаи суғуртаи иҷтимоӣ (СИН);

- нусхаи билети ҳарбӣ (барои шахсоне, ки хизмати ҳарбиро адо намудаанд).  

Талаботи тахассусӣ

барои ишғоли мансаби сармутахассис:

–        таҳсилоти олии касбӣ, ихтисоси ба мансаби ишғолшаванда мувофиқ, ки иҷрои самараноки вазифаҳои мансаби мазкури маъмурии хизмати давлатиро таъмин карда метавонад;

–  2 сол собиқаи хизмати давлатӣ ё 3 сол собиқаи умумии меҳнатӣ;

–        малакаи хуби муошират бо аҳли ҷомеа, аз ҷумла маҳорати ба роҳ мондани ҳамкорӣ ҳангоми татбиқи манфиатҳои давлатӣ;

–        донистани Конститутсияи Ҷумҳурии Тоҷикистон, дигар қонунҳо ва санадҳои меъёрии ҳуқуқии соҳавӣ;

–        донистани таърих, фарҳанг, муқаддасоти миллӣ, забони давлатӣ ва як забони хориҷӣ;

–        кор карда тавонистан бо компютер.

Талаботи тахассусӣ

барои ишғоли мансаби мутахассиси пешбар:

–        таҳсилоти олии касбӣ, ихтисоси ба мансаби ишғолшаванда мувофиқ, ки иҷрои самараноки вазифаҳои мансаби мазкури маъмурии хизмати давлатиро таъмин карда метавонад;

– 1 сол собиқаи хизмати давлатӣ ё 2 сол собиқаи умумии меҳнатӣ;

–        малакаи хуби муошират бо аҳли ҷомеа, аз ҷумла маҳорати ба роҳ мондани ҳамкорӣ ҳангоми татбиқи манфиатҳои давлатӣ;

–        донистани Конститутсияи Ҷумҳурии Тоҷикистон, дигар қонунҳо ва санадҳои меъёрии ҳуқуқии соҳавӣ;

–        донистани таърих, фарҳанг, муқаддасоти миллӣ, забони давлатӣ ва як забони хориҷӣ;

–        кор карда тавонистан бо компютер.

Талаботи тахассусӣ

барои ишғоли мансаби мутахассис:

–        тањсилоти олӣ ё миёнаи касбӣ, ихтисоси ба мансаби ишғолшаванда мувофиқ, ки иҷрои самараноки вазифаҳои мансаби мазкури маъмурии хизмати давлатиро таъмин карда метавонад;

–        1 сол собиқаи умумии меҳнатӣ;

–        малакаи хуби муошират бо аҳли ҷомеа, аз ҷумла маҳорати ба роҳ мондани ҳамкорӣ ҳангоми татбиқи манфиатҳои давлатӣ;

–        донистани Конститутсияи Ҷумҳурии Тоҷикистон, дигар қонунҳо ва санадҳои меъёрии ҳуқуқии соҳавӣ;

–        донистани таърих, фарҳанг, муқаддасоти миллӣ, забони давлатӣ ва як забони хориҷӣ;

–        кор карда тавонистан бо компютер.

Суроғаи қабули ҳуҷҷатҳо:

Ҳуҷҷатҳо аз ҷониби Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон дар муҳлати 21 рӯз баъди чопи аввалини эълон дар шакли хаттӣ ё электронӣ қабул карда мешаванд.

Суроға: шаҳри Душанбе, кӯчаи Варзишгарон 6, телефон: 250-37-02; 902-77-66-22, суроғаи электронӣ: kadr-07@bk.ru

          Эзоҳ: Иловапулӣ ба маоши мансабӣ барои собиқаи хизмати давлатӣ ҳар моҳ ба андозаи муқарраргардида пардохт карда мешавад. Ҳамчунин, барои ба кор қабул намудан ба менеҷерҳои сатҳи баланд бартарӣ дода мешавад.

Ҳамкорони гиромӣ, омӯзгорону устодон, кормандон, хонандагону донишҷӯёни муассисаҳои таҳсилоти ибтидоӣ ва миёнаи касбӣ!

Фарорасии Соли Нави мелодиро ба ҳар яки Шумо самимона табрик гуфта, бароятон саломатии бардавом, рӯзгори ободу осуда, илҳоми эҷодӣ ва муваффақиятҳои пайдарпай орзу менамоям.

Соли сипаришуда барои соҳаи таҳсилоти ибтидоӣ ва миёнаи касбӣ соли пурмазмун ва саршор аз рӯйдодҳои муҳим ба ҳисоб меравад. Тавре ки дар Паёми Президенти Ҷумҳурии Тоҷикистон ба Маҷлиси Олӣ зикр гардид, рушди соҳаи таҳсилоти касбӣ, яке аз самтҳои афзалиятноки сиёсати иҷтимоии давлат ба шумор рафта, он ҳамчун омили калидии пешрафти иқтисодиву иҷтимоии кишвар арзёбӣ мегардад.

Таваҷҷуҳи доимӣ ва ғамхориҳои пайвастаи Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон ба соҳаҳои таҳсилоти ибтидоӣ ва миёнаи касбӣ дар амал тадриҷан натиҷаҳои назаррас ба бор оварда истодааст. Бо дастгирии бевоситаи Роҳбари давлат дар самти таҳкими заминаи моддию техникӣ, беҳтар намудани шароити таълиму тарбия ва фароҳам овардани имкониятҳои мусоиди омӯзиш тадбирҳои муҳим амалӣ гардиданд. Аз ҷумла, дар соли сипаришаванда 47 муассисаи таълимӣ аз таъмири ҷорӣ бароварда шуда, сатҳу сифати шароити таълим ба маротиб беҳтар гардид.

Ҳамзамон, биноҳои нави иловагии 3 муассисаи таълимӣ ва хобгоҳи Литсейи касбии техникии ноҳияи Вахш аз ҷониби Пешвои миллат мавриди истифода қарор гирифт, ки ин иқдомҳо нишонаи таваҷҷуҳу дастгирии ҷавонону касбомӯзон ва рушди соҳаи таҳсилоти касбӣ дар кишвар мебошанд.

Дар баробари ин, бо мақсади такмили заминаи ҳуқуқӣ ва мутобиқ намудани соҳа ба талаботи бозори меҳнат, як қатор санадҳои меъёрӣ-ҳуқуқии соҳавӣ, аз ҷумла қонунҳои соҳавӣв а барномаҳои давлатӣ қабул гардиданд, ки барои баланд бардоштани сифати таҳсилот, таҳкими идоракунӣ ва рушди устувори муассисаҳои таҳсилоти касбӣ заминаи мусоид фароҳам оварданд.

Имрӯз соҳаҳои таҳсилоти ибтидоӣ ва миёнаи касбӣ дар омода намудани мутахассисони соҳибкасб, ҷавобгӯ ба талаботи иқтисоди миллӣ ва бозори меҳнат нақши муҳим мебозанд. Бо итминон метавон гуфт, ки омӯзгорон ва кормандони соҳа минбаъд низ бо ҳисси баланди масъулият, ватандӯстӣ ва садоқат ба касби худ фаъолият намуда, дар татбиқи ҳадафҳои стратегии давлат саҳми арзандаи худро мегузоранд.

Бо чунин ниятҳои нек, бори дигар фарорасии Соли Навро ба тамоми аҳли соҳа самимона табрик гуфта, бароятон саломатӣ, хушбахтӣ, осоиштагии хонадон, муваффақиятҳои касбӣ ва дастовардҳои боз ҳам бештар орзу менамоям. Бигзор Соли Нав соли пешрафт, навоварӣ ва татбиқи нақшаҳои созанда бошад.

21 декабр дар толори Консерваторияи давлатии Санкт-Петербург ба номи Римский-Корсаков маросими супоридани Ҷоизаи байналмилалии сулҳи ба номи Лев Толстой ба роҳбарони давлатҳои Тоҷикистон, Узбекистон ва Қирғизистон баргузор гардид.

Дар вазъияти тантанавӣ ба Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва ба роҳбарони давлатҳои Узбекистон ва Қирғизистон Ҷоизаи байналмилалии сулҳи ба номи Лев Толстой супорида шуд.

Роҳбари давлат муҳтарам Эмомалӣ Раҳмон ва сарони давлатҳои ҳамсояи мо бо ин ҷоизаи фахрӣ дар соли 2025 барои саҳми бузург дар таҳкими сулҳу амният дар минтақаи Осиёи Марказӣ сарфароз гардиданд.

Ёдовар мешавем, ки 31 марти соли 2025 дар нишасти сарони Тоҷикистон, Қирғизистон ва Ӯзбекистон дар шаҳри Хуҷанд созишномаи таърихӣ дар хусуси сарҳадҳои се давлат ва эъломияи Хуҷанд доир ба дӯстии абадӣ ба имзо расида, масоили сарҳадии миёни се давлати ҳамсоя ҳалли ниҳоии худро пайдо намуданд.

Ин руйдодҳои таърихӣ ба таъмини амну субот, рушди устувор ва болоравии нуфузу эътибори байналмилалии минтақаи Осиёи Марказӣ ҳамаҷониба мусоидат намуд.

21 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо сафари корӣ вориди шаҳри Санкт-Петербурги Федератсияи Русия шуданд.

Дар фурудгоҳи “Пулково” Президенти Ҷумҳурии Тоҷикистонро намояндагони воломақоми Федератсияи Русия самимона пазироӣ карданд.

Зимни ин сафар Сарвари давлат муҳтарам Эмомалӣ Раҳмон дар вохӯрии ғайрирасмии роҳбарони давлатҳои иштирокдори Иттиҳоди Давлатҳои Мустақил иштирок менамоянд.

21 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон барои иштирок дар вохӯрии ғайрирасмии сарони давлатҳои иштирокдори Иттиҳоди Давлатҳои Мустақил ба шаҳри Санкт-Петербурги Федератсияи Русия сафар карданд.

Дар фурудгоҳи байналмилалии Душанбе Президенти Ҷумҳурии Тоҷикистон муҳтарам Эмомалӣ Раҳмонро Раиси Маҷлиси миллии Маҷлиси Олии Ҷумҳурии Тоҷикистон, Раиси Маҷлиси намояндагони Маҷлиси Олии Ҷумҳурии Тоҷикистон, Сарвазири Ҷумҳурии Тоҷикистон, муовини якуми Роҳбари Дастгоҳи иҷроияи Президенти Ҷумҳурии Тоҷикистон ва дигар шахсони расмӣ гусел намуданд.

Дар ин сафар Президенти Ҷумҳурии Тоҷикистон муҳтарам Эмомалӣ Раҳмонро вазири корҳои хориҷӣ, ёрдамчии Президенти Ҷумҳурии Тоҷикистон оид ба масъалаҳои робитаҳои хориҷӣ ва дигар шахсони расмӣ ҳамроҳӣ менамоянд.

19 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Токио бо Раиси Палатаи мушовирони Парлумони Ҷопон Секигучи Масакадзу мулоқот намуданд.

Президенти кишвар муҳтарам Эмомалӣ Раҳмон таъкид доштанд, ки Тоҷикистон ба ҳамкории байнипарлумонӣ бо Ҷопон таваҷҷуҳи хос зоҳир менамояд.

Дипломатияи парлумонӣ василаи муассири таҳкими минбаъдаи муколамаи байнидавлатӣ номида шуд.

Пешбурди робитаҳои фаъоли Гурӯҳи дӯстӣ ва ҳамкории Маҷлиси миллии Маҷлиси Олии Ҷумҳурии Тоҷикистон ва Палатаи мушовирони Парлумони Ҷопон зарур шумурда шуд.

Ҷонибҳо, ҳамчунин, оид ба дигар ҷанбаҳои дӯстонаи Тоҷикистону Ҷопон, самтҳои мавриди таваҷҷуҳ, аз ҷумла рушди ҳамкорӣ дар соҳаҳои муҳими иҷтимоию иқтисодӣ, бахшҳои инфрасохтор, саноат, энергетика, кишоварзӣ, ҳифзи муҳити зист ва тандурустӣ табодули андеша намуданд.

Ба масъалаи рушди ҳамкорӣ дар бахши иқтисоди рақамӣ, ҷорӣ намудани технологияҳои “сабз”, рақамӣ ва зеҳни сунъӣ таваҷҷуҳ зоҳир гардид.

Ҷалби сармоя ба бахши сайёҳӣ, рушди ҳамкории амалӣ бо Ҷопон дар соҳаи муҳоҷирати меҳнатӣ ва густариши муносибатҳои фарҳангиву башарӣ аз мавзуъоти дигари суҳбат буд.

19 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Токио бо Императори Ҷопон муҳтарам Наруҳито мулоқот намуданд.

Дар вохӯрӣ масоили муносибатҳои Тоҷикистону Ҷопон баррасӣ шуд.

Президенти кишвар муҳтарам Эмомалӣ Раҳмон ба Император барои пазироии самимӣ ва ҳусни таваҷҷуҳ изҳори сипос намуданд.

Гуфта шуд, ки муносибатҳои Тоҷикистону Ҷопон имрӯз доираи васеи ҳамкориро дар бахшҳои тиҷорату иқтисод, фарҳангиву гуманитарӣ ва дигар соҳаҳои мавриди таваҷҷуҳи тарафҳо фаро мегиранд.

Дастгирии Ҷопон дар татбиқи лоиҳаҳои хурду миёнаи бахшҳои инфрасохтор, нақлиёт, энергетика, кишоварзию экологӣ, инчунин, омодасозии захираҳои инсонӣ, тандурустиву беҳдошт, таъкид гардид.

Оид ба дигар масъалаҳои ҳамкории барои ҳарду ҷониб судманд табодули андеша сурат гирифт.

19 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Токио бо Директори иҷрокунандаи Созмони амнияти соҳаҳои металлургия ва энергетикаи Ҷопон (JOGMEC) Ичиро Такаҳара мулоқот намуданд.

Президенти кишвар муҳтарам Эмомалӣ Раҳмон дар оғози суҳбат иброз доштанд, ки мо ҳавасманди ҳамкорӣ бо Созмон барои амалисозии лоиҳаҳо дар бахшҳои энергетика ва истихроҷи маъданҳои кӯҳӣ мебошем.

Ба истифодаи имкониятҳои кишвари мо дар соҳаи саноат, муосирсозии технологияҳои истихроҷ ва коркарди маъданҳо ва таъсиси корхонаҳои истеҳсолии муштарак таваҷҷуҳи зиёд зоҳир гардид.

Роҳандозии ҳамкории амалӣ дар самти татбиқи лоиҳаҳо дар соҳаи энергеияи барқароршаванда бо ҷалби сармоя ва технологияҳои нав зарур шумурда шуд.

Ҳамчунин, таъкид гардид, ки мо ба иштироки фаъоли ширкатҳои ҷопонӣ дар татбиқи “технологияҳои сабз” дар Тоҷикистон манфиатдор ҳастем.

Аз Созмони амнияти соҳаҳои металлургия ва энергетикаи Ҷопон даъват карда шуд, ки бо ниҳодҳои давлатӣ, донишгоҳҳо ва муассисаҳои таҳқиқотии Тоҷикистон дар самти омӯзиш ва коркарди сарватҳои зеризаминӣ ҳамкории муштарак ба роҳ монад.

19 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Токио бо Президенти Ассотсиатсияи Ҷопон оид ба савдо бо Русия ва давлатҳои нави соҳибистиқлол (РОТОБО) Масами Ииҷима мулоқот намуданд.

Дар вохӯрӣ самтҳои ояндадори ҳамкорӣ миёни Тоҷикистон ва Ҷопон баррасӣ шуд.

Роҳбари давлат муҳтарам Эмомалӣ Раҳмон Ассотсиатсияи Ҷопон оид ба савдоро василаи муҳимми густариши робитаҳои иқтисодӣ ва таҳкими алоқаҳои тиҷоратӣ миёни кишварҳои мо номиданд.

Таъкид гардид, ки Тоҷикистон дорои захираҳои нодир, мавқеи географии муносиб ва иқтидори зиёди инсонӣ мебошад. Дар ин зимн гуфта шуд, ки ин имкониятҳо кишвари моро ба макони ояндадори ташаккули занҷираҳои логистикӣ ва истеҳсолӣ табдил медиҳанд.

Ба истифодаи имкониятҳои роҳандозии коркарди маҳсулоти кишоварзӣ, тавсеаи саноати нассоҷӣ, бонкдорӣ, зеҳни сунъӣ ва дорусозӣ таваҷҷуҳи зиёд зоҳир гардид.

Аз Ассотсиатсия даъват карда шуд, ки дар сохтмони нерӯгоҳҳои хурди барқии обӣ, офтобиву бодӣ ва муосиргардонии иншооти мавҷудаи энергетикӣ, ҳамчунин, ва таъсиси корхонаҳои муштарак иштирок намоянд.

Парвариши маҳсулоти аз ҷиҳати экологӣ тоза, аз ҷумла меваҷот, ангур, лӯбиёгиҳо ва растаниҳои шифобахш, самтҳои қобили таваҷҷуҳ дониста шуд.

Ҳамчунин, шароити мусоиди таъсиси корхонаҳои саноатӣ, истифодаи ашёи хоми минералӣ ва захираҳои энергетикӣ муаррифӣ гардид.

19 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Токио бо Президенти Агентии ҳамкории байналмилалии Ҷопон (ҶАЙКА) Акиҳико Танака мулоқот намуданд.

Президенти кишвар муҳтарам Эмомалӣ Раҳмон таъкид карданд, ки ҷониби Тоҷикистон сатҳи ҳамкорӣ бо Ҷопонро дар чаҳорчӯби Агентии ҳамкории байналмилалии Ҷопон (ҶАЙКА) баланд арзёбӣ мекунад.

Ҷонибҳо ба рушди ҳамкорӣ дар соҳаҳои муҳимми иқтисоди миллии кишвари мо, аз ҷумла ҷиҳати татбиқи лоиҳаҳои муштарак дар бахшҳои саноат, нақлиёт, энергетика, кишоварзӣ, обтаъминкунӣ, маориф ва тандурустӣ таваҷҷуҳи зиёд зоҳир намуданд.

Аз имзои ду созишномаи нави грантӣ оид ба лоиҳаҳои сохтмони як зеристгоҳ ва муосирсозии таҷҳизоти сканерии борҳо дар дидбонгоҳи гумрукӣ истиқбол карда шуд.

Ҷалби сармояи мустақими ҷопонӣ, аз ҷумла қарзҳои имтиёзноки иенӣ, аз мавзуъоти дигари суҳбат буд.

Рушди энергетикаи “сабз” аз самтҳои ояндадори ҳамкорӣ номида шуд.

Барои тавсеаи бахшҳои Барномаи “JDS” дар соҳаҳои тиб, нанотехнология, технологияҳои иттилоотӣ, техникаи авиатсионӣ, амнияти иттилоотӣ, ҳифзи муҳити зист ва таъсиси Маркази инноватсия ва технологияҳои рақамии Тоҷикистону Ҷопон дар кишвари мо изҳори ҳавасмандӣ карда шуд.

19 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Токио бо Раиси Гурӯҳи байнипарлумонии дӯстию ҳамкории “Тоҷикистон-Ҷопон”, узви Палатаи намояндагони Парламенти Ҷопон Кейҷи Фуруя мулоқот намуданд.

Президенти кишвар муҳтарам Эмомалӣ Раҳмон саҳми Гурӯҳи байнипарлумониро дар таҳкими дӯстӣ ва густариши ҳамкории Тоҷикистону Ҷопон муҳим арзёбӣ намуданд.

Ба татбиқи лоиҳаҳои мухталиф, аз ҷумла дар соҳаҳои энергетика, тандурустӣ, илм ва маориф, нақлиёт, кишоварзӣ ва тақвияти зарфиятҳои инсонӣ таваҷҷуҳи зиёд зоҳир гардид.

Ҷонибҳо ба рушди ҳамкорӣ дар бахши технологияҳои иттилоотӣ, таъсиси технопаркҳо, дастгирии бизнес-инкубаторҳо, стартапҳо ва омода кардани мутахассисони баландихтисоси соҳаи IT таваҷҷуҳ намуданд.

Соҳаи гуманитарӣ бахши муҳимми ҳамкории дуҷониба арзёбӣ шуд.

Масъалаҳои рушди табодули фарҳангӣ ва зиёд кардани квотаҳои таҳсилӣ барои шаҳрвандони Тоҷикистон дар муассисаҳои таҳсилоти олии Ҷопон, инчунин, тавсеаи давраҳои омӯзишӣ аз мавзуъоти дигари суҳбат буд.

18 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо сафари расмӣ ва барои иштирок дар Ҳамоиши Муколамаи «Осиёи Марказӣ - Ҷопон» вориди шаҳри Токиои Ҷопон шуданд.

Дар саҳни фурудгоҳи Ҳанеда Президенти Ҷумҳурии Тоҷикистон муҳтарам Эмомалӣ Раҳмонро намояндагони воломақоми Ҷопон гарму самимӣ истиқбол гирифтанд.

Ба ифтихори меҳмони олиқадр майдони фурудгоҳ бо парчамҳои давлатӣ оро ёфта буд.

(Бардошт аз Паёми Пешвои миллат муҳтарам Эмомалӣ Раҳмон ба Маҷлиси Олӣ 16.12.2025)

Ҳамасола дар фазои сулҳу субот ва ваҳдати миллӣ, Сарвари давлат муҳтарам Эмомалӣ Раҳмон Паёми солонаи худро ба Маҷлиси Олии Ҷумҳурии Тоҷикистон ироа мекунанд. Ин ҳуҷҷат роҳнамои стратегӣ барои рушди ҷомеа ва давлат маҳсуб меёбад.

Паёми имсола натиҷаҳои фаъолияти Ҳукумати Ҷумҳурии Тоҷикистонро таҳлил намуда, ҳамаи соҳаҳои ҳаётан муҳимро фаро мегирад. Пешвои миллат дар ин суханронӣ ба дастовардҳои иқтисодӣ, пешрафтҳои иҷтимоӣ, ҳамчунин ба мушкилот ва вазифаҳои минбада диққати ҷиддӣ доданд.

Ҳадафи асосии Паём равшан кардани самтҳои афзалиятноки рушди кишвар барои ҷомеа ва Ҳукумат мебошад. Он ҳамчун санади стратегӣ барои мардуми Тоҷикистон хизмат мекунад, ки дастовардҳои солҳои охир ва роҳҳои пешбурди ҳаёти давлатро нишон медиҳад.

Сарвари давлат зикр карданд, ки соли 2025 бо вуҷуди таъсири ҷаҳонишавӣ ва мушкилоти ҷаҳонӣ соли таърихӣ ва хотирмон буд, ки бо дастовардҳои бесобиқа дар тамоми соҳаҳои ҳаёти иҷтимоӣ ва иқтисодӣ хотима меёбад. Ин дастовардҳо натиҷаи заҳматҳои содиқонаи мардуми кишвар мебошад.

Дар Паём, инчунин, ба дастовардҳои байналмилалӣ ва фарҳангии Тоҷикистон ишора шуда, қабули қатъномаҳои Созмони Милали Муттаҳид, аз ҷумла эълони соли 2025 ҳамчун “Соли байналмилалии ҳифзи пиряхҳо”, соли 2027 “Соли байналмилалии маърифати ҳуқуқӣ” ва солҳои 2018-2028 Даҳсолаи байналмилалии амал “Об барои рушди устувор” ёдрас шуданд. Ин иқдомот собит мекунанд, ки Тоҷикистон бо роҳбарии Пешвои миллат дар арсаи байналмилалӣ мақоми пешқадам ва ташаббускор дорад.

Ҳамзамон, Пешвои миллат саҳми соҳибкоронро дар рушду нумуи кишвар таъкид карда, ба онҳо миннатдории самимонаи хешро баён намуданд. Ин эътироф нишон медиҳад, ки Ҳукумати кишвар барои ҳамгироии рушди иқтисод, бунёди роҳҳо, мактабҳо ва дигар инфрасохтори иҷтимоӣ аҳамияти махсус медиҳад.

Паём ба рушди соҳаҳои илму маориф, тандурустӣ, ҳифзи иҷтимоӣ, фарҳанг, варзиш ва сиёсати ҷавонон равона шудааст. Пешвои миллат зикр карданд, ки афзалияти аввалиндараҷа ба илму маориф дода мешавад, зеро онҳо пояи давлатдории демократӣ ва ҳуқуқбунёдро таъмин мекунанд.

Сарвари давлат таъкид карданд: «Ман аз рӯзҳои аввали фаъолиятам ба соҳаи маориф таваҷҷуҳи аввалиндараҷа зоҳир мекунам, зеро пешрафти тамоми соҳаҳо аз рушди илму маориф вобаста аст». Барои соли 2026 аз буҷет 14 миллиард сомонӣ барои соҳаи маориф ҷудо карда шудааст, ки нисбат ба даҳ сол пеш 5,5 баробар зиёд мебошад. Ин раванд нишон медиҳад, ки маориф омили стратегӣ барои пешрафти иҷтимоӣ ва иқтисодӣ ба ҳисоб меравад. Афзоиши маблағгузорӣ ба муассисаҳои таълимӣ сифати таҳсилотро баланд мебардорад ва заминаи воқеӣ барои навоварӣ, худшиносии миллӣ ва омодасозии насли ояндасоз фароҳам меорад.

Пешвои миллат дар ин суханронӣ тамоми мардуми Тоҷикистонро шод гардониданд, аз ҷумла бо пешниҳодҳои дастгирӣ, чун 25% афзоиши музди маоши кормандони муассисаҳои таълимӣ ва 20% афзоиши маоши кормандони соҳаҳои буҷетӣ, ҳамчунин афзоиши нафақаҳо ва пардохтҳои суғуртавӣ.

Бо назардошти ин дастовардҳо Пешвои миллат соли 2026-ро “Соли вусъат додани корҳои ободониву созандагӣ ва тақвияти худшиносиву худогоҳии миллӣ” эълон карданд. Ин иқдом дастур барои ҳар як сокини Тоҷикистон аст, ки бо Пешвои хирадпарвар ҳамқадам шуда, сиёсати давлат ва Ҳукуматро дар ҳаёти рӯзмарраи худ татбиқ намоянд.

Хулоса, Паём ҳуҷҷати фарогирест, ки барои пешбурди сиёсати хориҷӣ, рушди иқтисод, саноат, энергетика, роҳу нақлиёт, амният, тандурустӣ, фарҳанг ва маориф дастурҳо медиҳад. Ин санад барои замони қувват гирифтани рақобатҳои ҷаҳонӣ аҳамияти стратегӣ дорад. Пешвои миллат ба оромӣ ва суботи кишвар ишора намуда, таъкид карданд: «Агар суботу оромӣ набошад, ягон нақшаи нек амалӣ намешавад». Ин ибтикор нишон медиҳад, ки амният ва ваҳдати миллӣ заминаи ҳама гуна пешрафт мебошад.

ОДИНАЗОДА Латофат Амиршо,

директори Коллеҷи омӯзгории шаҳри Кӯлоб,

номзади илмҳои педагогӣ

16-уми декабри соли 2025 Паёми навбатии Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон “Дар бораи самтҳои асосии сиёсати дохилӣ ва хориҷии кишвар” ироа гардид. Ҳар як дастуру супориш ва ҳидоятҳои Пешвои муаззами миллат муҳтарам Эмомалӣ Раҳмон ҳамчун роҳнамои фаъолияти минбаъда дар ҳамаи соҳаҳо маҳсуб меёбад.

Паём роҳнамои стратегӣ ба сӯи зиндагии осоиштаи мардуми сарбаланди миллати тоҷик мебошад ва инро танҳо нафаре дарк карда метавонад, ки ҳисси миллӣ, ватандӯстӣ, меҳанпарастӣ ва худогоҳӣ дошта бошад. Ҳар фарде, ки ҳисси баланди ватандӯсти дорад, аз ҳар нуқтаи суханронинии Пешвои муаззами миллат баҳра мебарад.

Воқеан, зиндагии осоишта яке аз арзишҳои олӣ барои ҳар инсон ва ҳар ҷомеа ба шумор меравад. Он танҳо дар шароите имконпазир аст, ки сулҳу субот, волоияти қонун ва эҳтироми арзишҳои миллӣ таъмин бошанд. Роҳнамо ба сӯи зиндагии осоишта аз худшиносии миллӣ, маърифати баланд ва масъулияти шаҳрвандӣ оғоз меёбад. Маориф ва тарбияи дурусти насли ҷавон дар ин раванд нақши калидӣ доранд, зеро ҷомеаи босавод ба таассубу зӯроварӣ роҳ намедиҳад.

Ҳамчунин, меҳнатдӯстӣ ва соҳибкасб будан заминаи зиндагии арзанда ва устувории иҷтимоиро фароҳам месозад. Ваҳдату ҳамдигарфаҳмӣ миёни шаҳрвандон асоси таҳкими сулҳ мебошад. Ҳифзи арзишҳои фарҳангӣ ва ахлоқӣ ба ӣомеа оромию итминон мебахшад. Дар маҷмӯъ, зиндагии осоишта натиҷаи талоши муштарак, эҳтироми ҳамдигар ва масъулияти ҳар як фард дар назди давлат ва ҷомеа мебошад.

Маҳз Роҳбари давлат дар Паём таъкид намуданд, ки “Агар мо хоҳем, ки давлати пешрафта, Ватани обод ва зиндагии осуда дошта бошем, бояд кӯшиш кунем, ки фарзандонамон соҳиби саводу дониш ва касбу ҳунар шаванд”.

Ин гуфтаҳо таъкид ба он месозад, ки асоси пешрафти давлат, маориф ва малакаи дониш мебошад. Ҷомеае, ки ба омӯзиш ва тарбияи насли босавод аҳаммият медиҳад, метавонад ба рушди устувор ва рақобатпазир ноил гардад. Соҳибкасбу соҳибҳунар будани ӣавонон ба коҳиши бекорӣ, камбизоатӣ ва мушкилоти иӣтимоӣ мусоидат мекунад. Ин раванд суботи ӣомеа ва зиндагии осударо таъмин менамояд. Қувваи кории босалоҳият ва дорои касбу ҳунар омили асосии рушди иқтисоди миллӣ мебошад. Маҳз кадрҳои донишманд метавонанд саноат, технология ва соҳибкориро рушд диҳанд. Тарбияи фарзандон дар рӯҳияи донишомӯзӣ ва меҳнатдӯстӣ ба таҳкими худшиносии миллӣ ва ватандӯстӣ мусоидат мекунад. Ин раванд бақои давлат ва амнияти миллиро таъмин менамояд. Танҳо бо омода намудани насли соҳибилму соҳибҳунар метавон Тоӣикистонро ба давлати пешрафта табдил дод.

Инчунин, дар Паём Сарвари давлат муҳтарам Эмомалӣ Раҳмон ба мардуми шарифи Тоҷикистон муроҷиат карда, чунин изҳор доштанд: “Мо бояд дар хотир дошта бошем, ки ояндаи давлату миллат аз насли босаводу донишманд, соҳибкасбу соҳибҳунар, соҳибмаърифату соҳибфарҳанг, дур аз таассубу хурофот, ватандӯсту ватанпараст ва дорои ҳисси баланди худшиносии миллӣ вобастагии амиқ дорад”.

Тарбияи ҷавонон дар рӯҳияи ватандӯстӣ ва худшиносии миллӣ ба таҳкими истиқлолият ва ваҳдати миллӣ мусоидат мекунад. Чунин насл барои ҳимояи манфиатҳои давлат омода мебошад. Соҳибмаърифату соҳибфарҳанг будани насл барои ҳифзи арзишҳои миллӣ ва ахлоқӣ аҳаммияти калон дорад. Ин ҳолат ҷомеаро аз хурофот, ифротгароӣ ва таассуб ҳифз мекунад. Қайд менамоем, ки ин андешаҳо ифода аз он мекунад, ки амният, субот ва ояндаи дурахшони давлат аз сифатҳои зеҳнӣ, касбӣ ва маънавии насли ӣавон вобаста аст. Танҳо насли солим метавонад рушди устувори миллатро таъмин намояд.

Бо доштани чунин фарҳангу тамаддуни бостонӣ мо набояд ба таассубу ифротгароӣ ва тақлид ба фарҳанге, ки бароямон бегонаву хатарбор аст, роҳ диҳем. “Гуфтори нек, рафтори нек, пиндори нек” аст роҳнамо ба сӯи зиндагии осоишта.

Дар маҷмуъ, Паём роҳнамо барои рушди устувор ва ояндаи дурахшони Тоҷикистон азиз мебошад.

Хайрулло СОДИҚЗОДА,

сармутахассиси Раёсати таҳсилоти миёнаи касбии Кумита

Дар марҳалаи кунунии рушди тамаддуни башарӣ давлатҳое муваффақ ҳисобида мешаванд, ки тавони пешбинӣ, банақшагирии стратегӣ ва ташаккули диди дарозмуддатро доро мебошанд. Пами навбатии Пешвои миллат ба Маҷлиси Олии Ҷумҳурии Тоҷикистон ҳамчун ҳуҷҷати сиёсӣ, иҷтимоӣ ва иқтисодии фарогир арзёбӣ мешавад, ки дар он роҳи тайкардаи давлат дар масири соҳибистиқлолӣ, вазъи имрӯз ва дурнамои ояндаи кишвар бо диди амиқ ва масъулиятшиносӣ таҳлил шудааст.

Паём дар баробари ҳисоботи фаъолияти солонаи давлат будан, ҷамъбасти таҷрибаи давлатдории навини тоҷикон ва пешниҳоди модели рушди миллӣ дар асри XXI мебошад. Дар шароите, ки ҷаҳон бо буҳронҳои иқтисодӣ, низоъҳои геосиёсӣ, тағйирёбии иқлим, таҳдидҳои амниятӣ ва рақобати шадиди технологӣ рӯ ба рӯ аст, Тоҷикистон сиёсати субот, ҳамгироии байналмилалӣ ва рушди устуворро ҳамчун самти асосии фаъолияти худ интихоб намудааст.

Дар ин суханронӣ бо далелҳои мушаххас нишон дода шуд, ки кишвар тавонист солҳои охир нишондиҳандаҳои асосии макроиқтисодиро ба таври устувор нигоҳ дорад. Афзоиши маҷмуи маҳсулоти дохилӣ, болоравии даромади пулии аҳолӣ, беҳтар гардидани нишондиҳандаҳои иҷтимоӣ ва коҳиши сатҳи камбизоатӣ натиҷаи сиёсати созандаи давлат мебошанд. Ин дастовардҳо дар шароите ба даст омаданд, ки иқтисоди ҷаҳонӣ бо ноустувории шадид рӯ ба рӯ мебошад.

Яке аз мавзуъҳои меҳварии Паём масъалаи рушди иқтисоди миллӣ тавассути саноатикунонии босуръат аст. Пешвои миллат саноатро ҳамчун муҳаррики асосии рушди иқтисодӣ ва кафили истиқлолияти воқеии давлат арзёбӣ намуданд. Бунёди ҳазорҳо корхонаҳои саноатӣ, зиёд гардидани ҳаҷми истеҳсолот, диверсификатсияи соҳаҳои иқтисодӣ ва таъсиси ҷойҳои нави корӣ имкон дод, ки Тоҷикистон тадриҷан аз кишвари истеъмолӣ ба кишвари истеҳсолкунанда табдил ёбад. Ин раванд аҳаммияти иқтисоди иҷтимоӣ дорад, зеро он ба афзоиши шуғлнокии аҳолӣ, баланд бардоштани сатҳи зиндагӣ ва устувории иҷтимоӣ мусоидат мекунад.

Дар Паём рушди соҳаи энергетика ҳамчун пояи амнияти миллӣ ва рушди дарозмуддат мавқеи марказӣ дошт. Тоҷикистон, ки дорои захираҳои бузурги гидроэнергетикӣ мебошад, сиёсати худро ба истифодаи оқилона ва устувори ин сарватҳо равона кардааст. Бунёд ва таҷдиди неругоҳҳои барқи обӣ, татбиқи лоиҳаҳои бузурги энергетикӣ ва рушди манбаъҳои барқароршавандаи энергия кишварро ба яке аз тавлидгарони муҳими энергетикии минтақа табдил медиҳад. Пешвои миллат таъкид намуданд, ки истиқлолияти энергетикӣ кафили рушди иқтисодӣ ва омили муҳими амнияти миллӣ мебошад.

Ҷанбаи дигар таваҷҷуҳи амиқ ба масъалаи рақамикунонии иқтисод ва идоракунии давлатӣ мебошад. Ҷорӣ намудани технологияҳои рақамӣ, истифодаи зеҳни сунъӣ ва низомҳои муосири иттилоотӣ ҳамчун шарти ҳатмии рақобатпазирии кишвар дар ҷаҳони муосир арзёбӣ мешавад. Таҷрибаи татбиқи низоми биллингӣ дар соҳаи энергетика нишон дод, ки истифодаи технология метавонад сатҳи шаффофиятро боло бурда, талафот, фасод ва таъсири омили инсониро ба таври назаррас коҳиш диҳад. Ин таҷриба метавонад барои дигар соҳаҳои иқтисод ва идоракунӣ намунаи ибрат бошад.

Дар баробари иқтисод ва технология, дар паём ба самтҳои ҳифзи муҳити зист ва мубориза бо тағйирёбии иқлим аҳаммияти аввалиндараҷа дода шуд. Тоҷикистон ҳамчун кишвари кӯҳӣ, ки сарчашмаи асосии захираҳои оби минтақа мебошад, масъулияти бузурги байналмилалиро бар дӯш дорад. Пешниҳод ва қабули қатъномаҳои байналмилалӣ оид ба ҳифзи пиряхҳо, криосфера ва захираҳои об нишон медиҳад, ки Тоҷикистон дар ҳалли мушкилоти глобалии башарият саҳми фаъол дорад. Ин ташаббусҳо мавқеи кишварро дар арсаи байналмилалӣ тақвият бахшида, Тоҷикистонро ҳамчун давлати ташаббускор муаррифӣ мекунанд.

Дар Паём рушди илму маориф ҳамчун омили калидии ояндаи давлат ба таври муфассал баррасӣ шуд. Пешвои миллат таъкид намуданд, ки бе насли босавод, донишманд ва соҳибкасб ҳама гуна рушди устувор имконнопазир аст. Афзоиши маблағгузории соҳа, такмили низоми таҳсил, гузариш ба стандартҳои байналмилалӣ, таваллуҳ ба рушди фанҳои дақиқ ва табиатшиносӣ ва омодасозии кадрҳои баландихтисос Тоҷикистонро ба сӯи ҷомеаи донишбунёд роҳнамоӣ мекунад. Дар ин раванд худшиносии миллӣ, ҳифзи арзишҳои фарҳангӣ ва таърихи миллӣ ҳамчун ҷузъи ҷудонопазири тарбияи насли наврас таъкид мегардад.

Ҷанбаҳои иҷтимоии паём низ аҳаммияти махсус доранд. Баланд бардоштани музди меҳнат, нафақа, стипендия ва дастгирии гуруҳҳои осебпазир нишон медиҳад, ки сиёсати давлат ба ҳифзи шаҳрвандон ва вазъи зиндагии онҳо нигаронида шудааст. Давлат рушди иқтисодиро ҳамчун василае барои беҳтар намудани зиндагии мардум арзёбӣ мекунад. Ин равиш ба таҳкими эътимоди шаҳрвандон ба давлат ва суботи иҷтимоӣ мусоидат менамояд.

Нақши ҷавонон ва занон дар Паём ҳамчун неруи асосии пешбарандаи ҷомеа таъкид шуд. Ҷавонон ҳамчун идомадиҳандагони роҳи давлатдории миллӣ ва занон ҳамчун сутуни оила ва ҷомеа дар маркази таваҷҷуҳи сиёсати иҷтимоии давлат қарор доранд.

Хулоса, Паёми Пешвои миллат ба Маҷлиси Олӣ ҳуҷҷати фарогир ва сарнавиштсоз аст, ки ҳамаи соҳаҳои ҳаёти давлат ва ҷомеаро дар бар мегирад. Ин суханронӣ ҷомеаро ба ваҳдат, худогоҳӣ, масъулиятшиносӣ ва меҳнати созанда даъват намуда, нишон медиҳад, ки танҳо бо иттиҳод, дониш ва сиёсати дурандешона метавон ба ҳадафҳои бузурги миллӣ ноил гардид. Тоҷикистон дар ин паём ҳамчун давлати дорои диди равшан, сиёсати устувор ва ояндаи умедбахш муаррифӣ мешавад, ки қодир аст дар шароити мураккаби ҷаҳони муосир роҳи рушди худро мустақилона ва боэътимод идома диҳад.

НИЗОМЗОДА Зокирҷон Мукарам,

директори Коллеҷи техникии ДТТ

ба номи академик М. Осимӣ

(Бардошт аз Паёми Пешвои миллат муҳтарам Эмомалӣ Раҳмон ба Маҷлиси Олӣ 16.12.2025)

Тағйирёбии босуръати иқтисоди ҷаҳонӣ, рушди технологияҳои рақамӣ ва равандҳои саноатикунонӣ талаботи бозори меҳнатро пайваста дигаргун месозанд. Дар чунин шароит, Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҳамчун ҳуҷҷати стратегии давлатӣ самтҳои асосии омода намудани захираҳои инсонӣ ва мутобиқсозии низоми таҳсилот ба талаботи иқтисоди миллӣ ва минтақавиро равшан муайян мекунад.

Бозори меҳнати муосир аз мутахассисон дониши назариявӣ, малакаҳои амалӣ, қобилияти мутобиқшавӣ ва омодагӣ ба омӯзиши пайвастаро талаб мекунад. Корфармоён имрӯз бештар ба он ҷавононе таваҷҷуҳ доранд, ки касбро дар амал аз худ кардаанд, бо техника ва технологияҳои нав ошно ҳастанд ва метавонанд зуд ба равандҳои истеҳсолӣ ворид шаванд.

Дар ин замина, муассисаҳои таҳсилоти ибтидоии касбӣ бояд аз шакли анъанавии омӯзиш берун баромада, ба таълими амалӣ, таҷрибаомӯзӣ дар истеҳсолот ва рушди салоҳиятҳои касбӣ аҳамияти аввалиндараҷа диҳанд.

Яке аз вазифаҳои муҳими муассисаҳои таҳсилоти ибтидоии касбӣ мутобиқ намудани ихтисосҳо ва барномаҳои таълимӣ ба ниёзҳои воқеии иқтисоди миллӣ мебошад. Рушди соҳаҳои саноат, сохтмон, кишоварзӣ, нақлиёт, хизматрасонӣ ва технологияҳои иттилоотӣ талаб мекунад, ки рӯйхати касбҳо ва муҳтавои таълим пайваста навсозӣ гардад. Дар ин раванд, ҳамкории зич бо корхонаҳо, ташкилотҳо ва бахши хусусӣ аҳамияти ҳалкунанда дошта, имкон медиҳад, ки барномаҳои таълимӣ бо талаботи бозори меҳнат мувофиқ гарданд.

Паёми Пешвои миллат, ҳамчунин, ба масъалаи рушди минтақаҳо ва таъмини шуғли аҳолӣ таваҷҷуҳи махсус зоҳир менамояд. Муассисаҳои таҳсилоти ибтидоии касбӣ дар ин самт метавонанд нақши калидӣ бозанд, зеро онҳо имконият доранд ҷавонони маҳаллиро бо касбҳои бозорталаб таъмин намуда, муҳоҷирати меҳнатиро коҳиш диҳанд ва рушди иқтисодии маҳалҳоро тақвият бахшанд. Омӯзиши касбҳои амалӣ дар маҳал, таъсиси марказҳои касбомӯзӣ ва ҷалби ҷавонон ба меҳнати истеҳсолӣ омили муҳими суботи иҷтимоӣ ба ҳисоб меравад.

Дар баробари ин, таҳсилоти ибтидоии касбӣ бояд ба рушди малакаҳои умумии меҳнатӣ, аз қабили фарҳанги меҳнат, масъулиятшиносӣ, интизом ва малакаҳои коммуникатсионӣ низ аҳамият диҳад. Зеро бозори меҳнат на танҳо мутахассиси соҳиби касб, балки шахсияти омода ба кор дар муҳити рақобатпазирро талаб мекунад. Дар ин ҷода, такмили ихтисоси омӯзгорон, истифодаи усулҳои муосири таълим ва ворид намудани унсурҳои омӯзиши рақамӣ нақши муҳим мебозанд.

Хулоса, ояндаи бозори меҳнат талаб мекунад, ки муассисаҳои таҳсилоти ибтидоии касбӣ дар партави Паёми Президенти Ҷумҳурии Тоҷикистон фаъолияти худро арзёбӣ намуда, ба таҳкими робита бо иқтисод, баланд бардоштани сифати таълим ва омодасозии мутахассисони амалгаро таваҷҷуҳи бештар зоҳир намоянд. Кумита оид ба таҳсилоти ибтидоӣ ва миёнаи касбӣ минбаъд низ ислоҳоти заруриро роҳандозӣ намуда, барои татбиқи дастуру ҳидоятҳои Пешвои миллат ва ташаккули бозори меҳнати муосир заминаи устувор фароҳам меорад.

АЛИЗОДА Алишер Ҳикматулло,

муовини раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон, н и.п

(Бардошт аз Паёми Пешвои муаззами миллaт муҳтaрaм Эмомaлӣ Рaҳмон ба Маҷлиси Олии кишвар 16.12.2025)

Паёми навбатии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҳамчун санади муҳими сиёсати давлатӣ самтҳои асосии рушди устувори кишварро дар шароити таҳаввулоти ҷаҳонӣ муайян намуда, ба тамоми соҳаҳои ҳаёти ҷомеа, аз ҷумла низоми таҳсилоти ибтидоӣ ва миёнаи касбӣ дастурҳои мушаххасро пешниҳод менамояд.

Дар паёми имсола масъалаи тайёр намудани захираҳои кадрии ҷавобгӯ ба талаботи иқтисоди миллӣ, рушди саноатикунонӣ, рақамисозии иқтисод ва баланд бардоштани сатҳи зиндагии аҳолӣ ҳамчун афзалиятҳои калидии сиёсати давлатӣ таъкид гардиданд, ки татбиқи онҳо бевосита ба сатҳ ва сифати таҳсилоти касбӣ вобастагии зич дорад.Пешвои миллат дар паём бо таҳлили амиқи дастовардҳои иқтисодию иҷтимоии кишвар нишон доданд, ки рушди устувори иқтисоди миллӣ, коҳиши сатҳи камбизоатӣ ва афзоиши даромади аҳолӣ натиҷаи сиёсати дурусти давлат дар самти омодасозии кадрҳо ва истифодаи самараноки захираҳои инсонӣ мебошад.

Дар ҳамин замина, нақши таҳсилоти ибтидоӣ ва миёнаи касбӣ ҳамчун пойдевори асосии ташаккули мутахассисони кордон ва рақобатпазир махсус таъкид мегардад. Зеро маҳз муассисаҳои таҳсилоти касбӣ метавонанд иқтисодиётро бо кадрҳои ихтисосманд, соҳиби малакаҳои муосир ва мутобиқ ба талаботи бозори меҳнат таъмин намоянд.

Дар Паём ба зарурати мутобиқсозии низоми таҳсилоти касбӣ ба талаботи иқтисоди саноатӣ ва инноватсионӣ ишора шуда, таъкид гардид, ки рушди соҳаҳои саноат, кишоварзӣ, энергетика, нақлиёт ва хизматрасониҳо бе мутахассисони баландихтисос ғайриимкон аст. Дар ин замина, муассисаҳои таҳсилоти ибтидоӣ ва миёнаи касбӣ вазифадор мебошанд, ки барномаҳои таълимиро бозбинӣ намуда, ба равияҳои нав, аз ҷумла технологияҳои рақамӣ, автоматикунонӣ, зеҳни сунъӣ, логистика, хизматрасонии муосир ва касбҳои бозорталаб таваҷҷуҳи бештар зоҳир намоянд.

Яке аз нуктаҳои муҳими паём, ки аҳамияти мустақим ба соҳаи таҳсилоти касбӣ дорад, масъалаи пайванди зичи соҳа бо бозори меҳнат мебошад. Пешвои миллат ба зарурати ҳамкории муассисаҳои таълимӣ бо корхонаҳои истеҳсолӣ, бахши хусусӣ ва соҳибкорӣ таъкид намуданд. Ин раванд имкон медиҳад, ки муҳассилин дар ҷараёни таҳсил малакаҳои амалӣ омӯхта, пас аз хатм бе мушкил ба ҷойи кор ҷалб гарданд. Кумита оид ба таҳсилоти ибтидоӣ ва миёнаи касбӣ дар ин самт тадбирҳои мушаххасро роҳандозӣ намуда, ҷалби корфармоён ба раванди таълим ва таҷрибаомӯзиро густариш медиҳад.

Дар паём, ҳамчунин, масъалаи рақамисозӣ ва истифодаи технологияҳои муосир ҳамчун шарти муҳими рушди соҳаҳо таъкид гардидааст. Ин раванд барои низоми таҳсилоти касбӣ низ аҳамияти калидӣ дорад. Ҷорӣ намудани усулҳои таълими рақамӣ, омӯзиши касбҳои нав ва такмили ихтисоси омӯзгорон аз ҷумлаи вазифаҳои афзалиятноке мебошанд, ки аз муҳтавои паём бармеоянд. Зеро дар шароити рақобати ҷаҳонӣ танҳо мутахассисоне муваффақ хоҳанд буд, ки бо технологияҳои муосир ва донишҳои замонавӣ мусаллаҳанд.
Паёми Пешвои миллат, инчунин, таҳсилоти касбиро ҳамчун воситаи муҳими коҳиши камбизоатӣ ва таҳкими суботи иҷтимоӣ арзёбӣ менамояд. Омӯзиши касбу ҳунар ба ҷавонон ва аҳолии қобили меҳнат имконият медиҳад, ки соҳиби ҷойи кори доимӣ гарданд, даромади устувор ба даст оранд ва дар рушди иқтисодии кишвар саҳм гузоранд. Аз ин лиҳоз, тавсеаи фарогирии таҳсилоти касбӣ, бахусус дар минтақаҳо, яке аз вазифаҳои калидии сиёсати давлатӣ боқӣ мемонад.

Хулоса, Паёми Президенти Ҷумҳурии Тоҷикистон муҳтарам Эмомалӣ Раҳмон барои низоми таҳсилоти ибтидоӣ ва миёнаи касбӣ ҳамчун ҳуҷҷати стратегии роҳнамо хизмат намуда, самтҳои афзалиятноки ислоҳот, рушди сифат ва мутобиқсозии он ба талаботи иқтисоди миллӣ ва бозори меҳнатро муайян менамояд.
Кумита оид ба таҳсилоти ибтидоӣ ва миёнаи касбӣ минбаъд низ тамоми кӯшишро ба харҷ медиҳад, то дастуру ҳидоятҳои Пешвои миллат сари вақт ва бо сифати баланд татбиқ гардида, заминаи устувор барои тайёр намудани кадрҳои касбии рақобатпазир ва рушди устувори Ҷумҳурии Тоҷикистон фароҳам оварда шавад.

ДАВЛАТЗОДА Баҳрулло Раҳмон,

муовини якуми раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон, номзади илмҳои иқтисодӣ

Саннаи 16 декабри соли 2025 Паёми Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» ироа гардид, ки онро метавон ҳамчун паёми муҳимми заминасози стратегии рушди иқтисодӣ ва худшиносии миллӣ арзёбӣ намуд.

Паём бо таҳлилу баррасии пайдарпайи мантиқӣ, фарогирии тамоми масъалаҳои марбут ба ҳаёти сиёсиву иқтисодӣ ва иҷтимоиву фарҳангии кишвар, риояи пурраи методологияи таҳқиқоти илмии муосир, ки дар он таҳлил, баррасӣ, натиҷагирӣ, пешниҳоди мушаххас ва хулосаву дастур ҷиҳати идомаи босамари минбаъда мебошад, аз ҷониби Пешвои муаззами миллат ба мардуми кишвар пешниҳод гардид.

Паёми навбатии Президенти Ҷумҳурии Тоҷикистон бо муҳтавои фарогири сиёсӣ, иқтисодӣ ва маънавии худ ҳамчун санади муҳими барномавии давлатдорӣ ба равандҳои ташаккули шуури шаҳрвандӣ ва худшиносии миллӣ таъсири амиқ мерасонад. Он иродаи ҷомеаро дар роҳи рушди устувор, масъулияти шаҳрвандӣ ва иштироки фаъол дар ҳаёти иҷтимоию иқтисодии кишвар тақвият бахшида, ҳисси ифтихор аз мансубият ба миллати куҳанбунёдро таҳким медиҳад. Ин паём бо такя ба сабақҳои таърихӣ ва арзишҳои фарҳангӣ ба мо ёдовар мешавад, ки миллати тоҷик ҳамчун вориси насли ориёӣ дорои тамаддун ва фарҳанги ғании беш аз шашҳазорсола мебошад, ки дар тӯли асрҳо арзишҳои хирад, адолат ва инсондӯстиро ҳифз ва интиқол додааст. Маҳз ҳамин огоҳии таърихӣ ва эҳсоси масъулияти маънавӣ дар назди аҷдодон ва наслҳои оянда зарурати таҳияи мақолаи мазкурро ба миён оварда, таҳлили илмии паёмро ҳамчун заминаи рушди иқтисодӣ ва таҳкими худшиносии миллӣ тақозо менамояд.

Ҳамин тавр, дар матлаби мазкур баъзе хулосаҳои  худро доир ба паёмҳои пешин, нақши онҳо дар рушди мушкилоти иҷтимоиву иқтисодии кишвар ва рушди он ва доир ба нуктаҳои асосии Паёми навбатии Пешвои муаззами миллат, ки ба риштаи таҳлил кашидем, пешниҳод мегардад.

Дар низоми сиёсии Ҷумҳурии Тоҷикистон Паёми Президенти кишвар ба Маҷлиси Олӣ тадриҷан ба як ниҳоди муҳими давлатдорӣ табдил ёфтааст, ки дар он натиҷаҳои марҳилаҳои муайяни рушди сиёсиву иҷтимоӣ ҷамъбаст гардида, самтҳои афзалиятноки ояндаи кишвар бо диди стратегӣ муайян карда мешаванд. Пайдоиш ва ташаккули паёмҳо ҳамчун шакли муосири иртиботи Роҳбари давлат бо ҷомеа ба марҳалаи таҳкими истиқлоли давлатӣ рост меояд, замоне ки Тоҷикистон пас аз фоҷиаи ҷанги шаҳрвандӣ ба эҳёи давлатдорӣ, барқарорсозии иқтисод ва ташаккули низоми нави арзишҳо ниёз дошт. Дар ин шароит паёмҳо тадриҷан ба мактаби тафаккури стратегӣ, идоракунии давлатӣ ва худшиносии миллӣ мубаддал гардиданд.

Таҷрибаи таърихии беш аз се даҳсолаи истиқлол нишон медиҳад, ки ҳар як Паёми Пешвои миллат дар ҷавоб ба талаботи мушаххаси замон ироа гардида, бо назардошти вазъи дохилӣ ва равандҳои байналмилалӣ шакл гирифтааст. Дар солҳои аввали истиқлол паёмҳо бештар ба масъалаҳои сулҳ, ваҳдати миллӣ, барқарорсозии сохторҳои давлатдорӣ ва таъмини амнияти ҷомеа равона шуда буданд. Ин марҳилаи таърихӣ бо он фарқ мекунад, ки худи мавҷудияти давлат таҳти хатар буда, ҳар як сухани Роҳбари давлат хусусияти сарнавиштсоз дошт. Дар чунин шароит паёмҳо нақши муттаҳидсозанда бозида, ҷомеаро ба сӯи сулҳ, ҳамдигарфаҳмӣ ва эҳтиром ба арзишҳои давлатдории навбунёд ҳидоят намуданд.

Бо таҳкими сулҳ ва барқарор гардидани ваҳдати миллӣ мазмун ва самти паёмҳо тадриҷан тағйир ёфт. Масъалаҳои рушди иқтисодӣ, ислоҳоти иҷтимоӣ, эҳёи инфрасохтор, ҷалби сармоя ва баланд бардоштани сатҳи зиндагии аҳолӣ ба меҳвари асосии онҳо табдил гаштанд. Дар ин марҳила паёмҳо ҳамчун абзори идоракунии стратегӣ хизмат намуда, байни ҳадафҳои сиёсӣ ва имкониятҳои иқтисодӣ иртиботи мантиқӣ барқарор карданд. Ҳар як паём дар баробари вазифагузорӣ механизми иҷро, масъулият ва назорати натиҷаҳоро низ дар бар мегирифт, ки ин ба ташаккули фарҳанги нави идоракунӣ дар кишвар мусоидат намуд.

Таҳлили маҷмӯии паёмҳо нишон медиҳад, ки онҳо тадриҷан ба як низоми мукаммали барномарезии давлатӣ табдил ёфтаанд. Дар онҳо ҳадафҳои кӯтоҳмуддат, миёнамуҳлат ва дарозмуддат бо ҳам пайваст гардида, рушди иқтисодӣ бо масъалаҳои иҷтимоӣ ва фарҳангӣ дар як замина баррасӣ мешавад. Ин равиш нишон медиҳад, ки Пешвои миллат рушди кишварро ҳамчун раванди танҳо иқтисодӣ намебинанд, балки онро ҳамчун раванде меҳисобанд, ки дар он инсон, фарҳанг, таърих ва худшиносии миллӣ нақши ҳалкунанда доранд. Маҳз ҳамин пайвастагии мантиқӣ паёмҳоро аз ҳисоботи расмӣ ба санади фалсафӣ-стратегӣ табдил додааст.

Дар солҳои минбаъда, бо ворид шудани Тоҷикистон ба марҳалаи рушди устувор, паёмҳо бештар ба масъалаҳои рақобатпазирии иқтисод, саноатикунонии босуръат, истифодаи технологияҳои муосир ва ҳамгироии кишвар ба иқтисоди ҷаҳонӣ равона шуданд. Ин раванд нишон медиҳад, ки паёмҳо ҳамеша хусусияти динамикӣ дошта, ба тағйироти муҳити байналмилалӣ мутобиқ мегарданд. Дар баробари ин, як унсури устувор дар ҳамаи паёмҳо ҳифз шудааст, ки таъкид ба нақши инсон, худшиносии миллӣ ва масъулияти шаҳрвандӣ ҳамчун пояи ҳар гуна пешрафт мебошад.

Нақши паёмҳо дар рушди кишварро метавон дар чанд самти асосӣ ҷамъбаст кард, ҳарчанд дар ин матн онҳо ҳамчун ҷараёни ягонаи фикр баррасӣ мешаванд. Пеш аз ҳама, паёмҳо ҳамчун абзори муайянсозии афзалиятҳои давлатӣ хизмат намуда, тамоми сохторҳои ҳокимиятро ба иҷрои вазифаҳои мушаххас сафарбар карданд. Дуюм, онҳо ба ташаккули фарҳанги ҳисоботдиҳӣ ва масъулият мусоидат намуданд, зеро ҳар як супориши дар паёми қаблӣ зикршуда дар паёмҳои минбаъда мавриди таҳлил ва баҳогузорӣ қарор мегирад. Сеюм, паёмҳо ба ҷомеа фаҳмонда медиҳанд, ки рушд раванди муштарак аст ва иштироки фаъолонаи шаҳрвандон дар татбиқи ҳадафҳои миллӣ зарур мебошад

Бо мурури замон, паёмҳо, инчунин, ба воситаи таҳкими худшиносии миллӣ табдил ёфтанд. Дар онҳо таърихи давлатдории тоҷикон, сабақҳои талхи гузашта ва арзишҳои фарҳангӣ пайваста таъкид мешаванд, то ҷомеа дар шароити ҷаҳонишавӣ асолати худро аз даст надиҳад. Ин равиш махсусан дар замоне аҳамият пайдо мекунад, ки ҷаҳони муосир бо буҳронҳои арзишӣ ва таҳдидҳои нави фарҳангӣ рӯ ба рӯ шудааст. Паёмҳо дар ин замина ҳамчун сипари маънавӣ хизмат намуда, ҷомеаро ба худогоҳӣ, эҳтиром ба таърих ва ҳифзи арзишҳои миллӣ даъват мекунанд.

Ҳамин тавр, пеш аз баррасии муфассали паёми Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки 16 декабри соли 2025 ироа гардид, бояд таъкид кард, ки он идомаи мантиқии силсилаи паёмҳо мебошад, ки ҳар кадоми онҳо марҳилаи муайяни рушди давлатдории тоҷиконро инъикос мекунанд. Паёми 16 декабри соли соли 2025 ироагардида дар ин занҷира ҷойгоҳи махсус дорад, зеро он на танҳо ҷамъбасти як давраи даҳсолаи рушди босубот, балки гузариш ба марҳилаи нави рақобатпазирии миллӣ ва ҷаҳонӣ мебошад.

Паёми навбатии Пешвои муаззами миллат дар шароите пешниҳод шуд, ки кишвар як марҳилаи муҳим ва сарнавиштсозро дар рушди худ паси сар намуд. Ин паём ҷамъбасти мантиқии як давраи тӯлонии рушди устувори сиёсӣ, иқтисодӣ ва иҷтимоӣ мебошад. Пешвои миллат паёмро дар заминаи воқеияти мушаххаси таърихӣ ироа намуда, нишон медиҳанд, ки дастовардҳои бадастомада тасодуфӣ нестанд, балки натиҷаи сиёсати пайгирона, идоракунии мутамарказ ва ҳамбастагии ҷомеа ба ҳисоб мераванд.

Дар оғози Паём таваҷҷуҳ ба рӯйдодҳои калидии сиёсӣ ва байналмилалии соли 2025 равона гардид, ки онҳо барои таҳкими мавқеи Тоҷикистон дар минтақа ва ҷаҳон аҳамияти махсус доранд. Ҳалли пурраи масъалаҳои сарҳадӣ бо Ҷумҳурии Қирғизистон, имзои санадҳои сеҷониба бо Қирғизистону Ӯзбекистон ва қабули Эъломияи Хуҷанд нишон медиҳанд, ки Тоҷикистон аз марҳалаи ҳалли мушкилоти меросӣ гузашта, ба сиёсати фаъол ва созандаи минтақавӣ ворид шудааст. Ин рӯйдодҳо заминаи боэътимоди рушди иқтисодӣ, тиҷорат ва ҳамкориҳои фаромарзиро фароҳам меоранд, ки бевосита ба беҳтар гардидани сатҳи зиндагии аҳолӣ таъсир мерасонанд.

Дар Паём рушди иқтисоди рақамӣ ва истифодаи зеҳни сунъӣ ҳамчун самти афзалиятноки сиёсати давлатӣ муаррифӣ шуд. Пешвои миллат бо овардани мисолҳои мушаххас, аз ҷумла ҷорӣ намудани низоми рақамии биллингӣ дар соҳаи энергетика, нишон доданд, ки чӣ гуна технологияҳои муосир метавонанд шаффофият, адолат ва самаранокиро таъмин намоянд. Коҳиши талафоти неруи барқ, афзоиши пардохтҳои воқеӣ ва ворид гардидани маблағҳои иловагӣ ба низоми энергетикӣ далели он аст, ки рақамикунонӣ абзори ислоҳоти идоракунӣ ва таҳкими эътимоди шаҳрвандон ба давлат мебошад. Ин эътимод дар навбати худ заминаи муҳими устувории иҷтимоӣ ва худшиносии миллӣ мебошад.

Дар Паёми навбатии Президенти Ҷумҳурии Тоҷикистон муҳтарам Эмомалӣ Раҳмон худшиносии миллӣ ҳамчун категорияи амиқи сиёсӣ, иҷтимоӣ ва фалсафӣ баррасӣ гардид. Пешвои миллат зикр карданд, ки рушди устувори иқтисодӣ ва иҷтимоӣ танҳо дар сурате метавонад пойдор бошад, ки он бо худогоҳии шаҳрвандон, эҳтиром ба таърих ва дарки масъулияти миллӣ ҳамоҳанг гардад. Дар ин замина, худшиносии миллӣ ҳамчун омили калидии амнияти ҷомеа ва давлат муаррифӣ мешавад, зеро ҷомеае, ки аз асолати худ огоҳ аст, ба осонӣ зери таъсири таҳдидҳои беруна ва равандҳои харобкори дохилӣ қарор намегирад.

Таъкиди Пешвои миллат ба насли босавод, соҳибмаърифат ва ватандӯст аз он шаҳодат медиҳад, ки худшиносии миллӣ, пеш аз ҳама, тавассути маориф, тарбия ва фарҳанг ташаккул меёбад. Аз ин рӯ, дар Паём таъкид гардид, ки ояндаи давлату миллат аз наслҳое вобаста аст, ки дорои ҷаҳонбинии илмӣ, ҳисси масъулияти шаҳрвандӣ ва эҳтиром ба арзишҳои таърихию фарҳангии худ мебошанд. Ин андеша бо таҷрибаи таърихии Тоҷикистон пайванди амиқ дорад, зеро маҳз заъфи худогоҳии миллӣ ва сатҳи пасти маърифати сиёсӣ дар солҳои гузашта боис гардид, ки ҷомеа ба буҳронҳои шадид рӯ ба рӯ шавад. Бинобар ин, Пешвои миллат худшиносии миллиро ҳамчун сабақи таърихӣ ва ҳамзамон, кафолати ояндаи устувор пешниҳод намуданд.

Дар Паём масъалаи хотираи таърихӣ ҷойгоҳи хосса дорад. Пешвои миллат таъкид намуданд, ки бедор намудани хотираи таърихӣ, бахусус дар миёни ҷавонон, яке аз вазифаҳои стратегии сиёсати давлатӣ мебошад. Таърих дар ин ҷо ҳамчун таҷрибаи ҷамъбастшудаи миллат баррасӣ мегардад, ки метавонад барои интихоби роҳи дурусти рушд дар шароити муосир хидмат намояд. Миллате, ки таърихи худро меомӯзад ва аз он сабақ мегирад, қодир аст хатоҳои гузашта такрор накунад ва ба оянда бо диди устувор қадам гузорад.

Ҷавонон дар Паём ҳамчун неруи асосии пешбарандаи ҷомеа муаррифӣ шуданд. Пешвои миллат бо ифтихор аз ҷавонони даврони истиқлол таъкид намуданд, ки маҳз онҳо метавонанд арзишҳои миллӣ ва дастовардҳои давлатдориро ҳифз ва идома диҳанд. Худшиносии миллӣ дар миёни ҷавонон бояд тавассути иштироки фаъол дар ҳаёти сиёсӣ, иқтисодӣ ва фарҳангии кишвар тақвият ёбад. Ин раванд ҷавононро аз тамошобини равандҳо ба иштирокчии фаъол табдил медиҳад, ки барои рушди устувори ҷомеа аҳаммияти стратегӣ дорад.

Бо наздик шудани ҷашни 35-солагии Истиқлоли давлатӣ паёми соли 2025 ҳамчун ҳуҷҷати сафарбаркунанда баромад мекунад, ки ҷомеаро ба марҳилаи нави созандагӣ ва рақобатпазирӣ раҳнамоӣ менамояд. Пешвои миллат таъкид намуданд, ки Истиқлол танҳо дастоварди таърихӣ набуда, масъулияти доимӣ мебошад. Дар шароити ҷаҳони пуртазод, ҳифзи истиқлол, баланд бардоштани обрӯи кишвар ва таъмин намудани ҷойгоҳи шоистаи Тоҷикистон дар арсаи ҷаҳонӣ танҳо тавассути иҷрои пайгирона ва босифати нишондодҳои паём имконпазир аст.

Дар ҷамъбасти мантиқии Паёми Президенти Ҷумҳурии Тоҷикистон муҳтарам Эмомалӣ Раҳмон, ки 16 декабри соли 2025 ироа гардид, иҷрои пурра ва босифати нишондодҳо ҳамчун шарти асосии табдил ёфтани ҳадафҳои эълоншуда ба натиҷаҳои воқеӣ баррасӣ мегардад. Пешвои миллат бо таъкиди пайваста ба масъулияти мақомоти давлатӣ, сохторҳои иқтисодӣ ва ҷомеаи шаҳрвандӣ нишон медиҳанд, ки паём барномаи мукаммали амал мебошад. Маҳз дар иҷрои дақиқи ин барнома мафҳуми худшиносии миллӣ мазмуни воқеӣ пайдо мекунад, зеро худогоҳии ҳақиқӣ на дар эъломия, балки дар рафтори масъулона, дар фарҳанги иҷро ва дар садоқат ба манфиатҳои давлату миллат таҷассум меёбад.

Фарҳод РАҲИМӢ,

раиси Кумита оид ба таҳсилоти ибтидоӣ

ва миёнаи касбии назди Ҳукумати Ҷумҳурии Тоҷикистон,

академики Академияи миллии илмҳои Тоҷикистон