Директори Коллеҷи тиббии шаҳри Хуҷанд н. и. т. Нурзода Амирҷон Рӯзихон конфронсро ифтитоҳ бахшида, аз ҷумла афзуд, ки дар Паёми навбатии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон қисмати калоне ба рушди соҳаҳои маориф, тандурустӣ, шуғли аҳолӣ ва дастгирии занону ҷавонон бахшида шудааст.

Президенти мардумӣ дар сиёсати хеш ободии сарзамин, зиндагии босаодати шаҳрвандон ва амнияту осудагиро дар мадди аввал гузошта, гаштаву баргашта таъкид бар бузургии миллати тоҷик карданд ва ҳамчунин дар назди шаҳрвандони Ҷумҳурии Тоҷикистон рисолати асосии худро дар таъмини амният ва фароҳам овардани зиндагии шоиста маънидод сохтанд. Сиву чор соли соҳибистиқлолӣ воқеан нишон дод, ки дар меҳвари сиёсати Пешвои миллат рушд ва некӯаҳволии халқи маҳбуб меистад.

Ҳамин таваҷҷуҳ аст, ки танҳо дар даҳ соли охир дар кишвар 1300 иншооти соҳаи тандурустӣ ба маблағи беш аз 5,3 миллиард сомонӣ сохта ба истифода дода шудааст. Буҷети соҳа аз 1 миллиарду 37 миллион сомонӣ дар соли 2015 ба 4 миллиарду 300 миллион сомонӣ расонда шуда, ба андозаи 4,2 баробар афзудааст.

Бо мақсади таъмини солимии аҳолӣ, истифодаи мақсаднок ва самараноки иншооту таҷҳизот ва маблағҳои пешбинишаванда Роҳбари давлат ба Ҳукумати мамлакат супориш доданд, ки масъалаи мукаммалсозии низоми маблағгузории соҳаи тандурустӣ, истифодаи мақсадноки маблағҳои буҷетӣ ва ғайрибуҷетӣ, гузариш ба низоми ғайринақдии пардохти хизматрасониҳо ва дигар масъалаҳои соҳаро ҳамаҷониба таҳлилу баррасӣ намояд ва ҷиҳати татбиқи ислоҳоти навбатӣ ва бартараф намудани мушкилоту камбудиҳои дар ин самт ҷойдошта тадбирҳои зарурӣ андешад.

Зарур аст, ки ҷавобан ба дастгириҳои Ҳукумати кишвар масъулин бояд тадбирҳои амалӣ андешанд. Президенти маҳбубамон қайд карданд: «Фароҳам овардани шароити зиндагии арзанда ва баланд бардоштани сатҳи зиндагии аҳолӣ, хусусан, гурӯҳҳои осебпазири ҷомеа, самти афзалиятноки сиёсати Ҳукумати мамлакат мебошад».

Сипас, Раиси Суди иқтисодии вилояти Суғд Парвиз Мирзозода баромад намуда, аз ҷумла зикр дошт, ки яке аз самтҳои муҳими Паёми Президенти Ҷумҳурии Тоҷикистонро ба Маҷлиси Олӣ такмили қонунгузорӣ ташкил медиҳад. Қонунҳои муосир барои татбиқи ҳадафҳои стратегии Ҷумҳурии Тоҷикистон заминаи боэътимод фароҳам меоранд. Онҳо ба баланд бардоштани сатҳи зиндагии мардум, таъмини амнияти ҷомеа ва давлат, таҳкими суботу оромӣ ва ваҳдати миллӣ мусоидат мекунанд. Сарвари давлат дар Паём таъкид намуданд, ки қонунгузорӣ яке аз сутунҳои асосии давлатдории муосир мебошад. Қонунҳои мукаммал, одилона ва ҷавобгӯ ба талаботи замон метавонанд рушди устувори иқтисодиву иҷтимоӣ, таҳкими суботи сиёсӣ ва ҳифзи ҳуқуқу озодиҳои шаҳрвандонро таъмин намоянд. Аз ин лиҳоз, таҳлили пайвастаи қонунгузории амалкунанда, бартараф намудани ихтилофоти меъёрӣ ва таҳияи пешниҳодҳои мушаххас ҷиҳати такмили он вазифаи муҳим арзёбӣ гардид.

Дар ҷараёни кори конфронс судяҳои Суди иқтисодии вилояти Суғд Толиб Давлатзода, Наврӯз Эмомализода, Борбад Ҳамроқулзода доир ба эълон гардидани «Соли байналмилалии маърифати ҳуқуқӣ» , “Соли 2026 соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ”, мафҳуми худшиносии миллӣ, ҳифзи арзишҳои миллӣ, оид ба самтҳои асосии сиёсати дохилию хориҷӣ, таҷлили 35солагии Истиқлоли давлатӣ, ҳифзи ваҳдату ягонагӣ, роҷеъ ба ҳалли масъалаҳои марзӣ, ташаббусҳои Тоҷикистон дар СММ, мубориза бо терроризму экстремизм ва ғайраҳо баромад намуданд.

Таъкид шуд, ки бо назардошти амалисозии муваффақонаи «Соли маърифати ҳуқуқӣ» дар Тоҷикистон дар соли 2024, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, зимни суханронӣ дар мубоҳисаҳои Иҷлоси 80-уми Маҷмаи Умумии СММ пешниҳод намуданд, ки ин ташаббус ба сатҳи байналмилалӣ бароварда шавад ва соли 2027 ҳамчун «Соли байналмилалии маърифати ҳуқуқӣ» эълон гардад. Бо ироаи ин пешниҳод, Роҳбари давлат аҳамияти умумиҷаҳонии маърифати ҳуқуқиро ҳамчун пояи асосии адолат, мудирияти муассир ва сулҳи пойдор таъкид намуданд. Қатънома нақши муҳим ва зарурии маърифати ҳуқуқиро дар пешбурди ҳуқуқи инсон, иштироки фаъоли ҷомеа ва дастрасӣ ба адолат таъкид менамояд.

«Соли байналмилалии маърифати ҳуқуқӣ» талошҳои ҷаҳониро ҷиҳати пешбурди ташаббусҳои миллӣ ва байналмилалии таълими ҳуқуқӣ аз ҷумла, фарогирии фанҳои ҳуқуқӣ дар барномаҳои таълимии муассисаҳои таҳсилоти умумӣ ва омӯзишгоҳҳои касбӣ; таҳкими дастрасӣ ба иттилооти ҳуқуқӣ ба мақсади он ки занон, кӯдакон ва ашхоси осебпазир тавонанд ҳуқуқҳои худро беҳтар дарк ва амалӣ намоянд; дастгирии ҷомеаи шаҳрвандӣ ва ташаббусҳои маҳаллӣ, ки ба рушди огоҳии ҳуқуқӣ ва омӯзиши ҳуқуқи инсон бахшида шудаанд; инчунин ташвиқи ҳамкории ниҳодҳои СММ, кишварҳои узв, муассисаҳои илмӣ-таҳқиқотӣ ва созмонҳои ҷомеаи шаҳрвандӣ барои мубодилаи таҷрибаи беҳтарин ва таҳкими дарки ҳуқуқ дар сатҳи глобалӣ, равона намояд.

Санади мазкур соли 2027-ро ҳамчун «Соли байналмилалии маърифати ҳуқуқӣ» эълон менамояд, ки ин рӯйдод қадами муҳим дар таҳкими ҳамкории байналмилалӣ ҷиҳати ташвиқи ҷомеаҳои огоҳ, адолатпеша ва масъулиятпазир ба ҳисоб меравад. Инчунин қатънома нақши созандаи Ҷумҳурии Тоҷикистонро дар пешбурди омӯзиши ҳуқуқ дар сатҳи ҷаҳонӣ ва роҳбарии дурандешонаи Сарвари давлат муҳтарам Эмомалӣ Раҳмон, ки ташаббуси навбатиашон имрӯз аз ҷониби ҷомеаи байналмилалӣ пазируфта шуд, эътироф менамояд.

Зикр гардид, ки мубориза бо терроризм, экстремизм, радикализм, гардиши ғайриқонунии маводи мухаддир, қочоқи силоҳ, ҷиноятҳои киберӣ ва дигар шаклҳои ҷинояткории муташаккили фаромиллӣ ҳамчун вазифаи аввалиндараҷа муайян гардид. Ин таҳдидҳо хусусияти фаромиллӣ дошта, мубориза бо онҳо ҳамоҳангии дохилӣ ва ҳамкории байналмилалиро тақозо мекунад.

Дар баробари иштироки фаъол дар равандҳои глобалӣ, Тоҷикистон саъю талошҳои худро барои таъмини сулҳу субот ва амнияти фарогир дар ҳамбастагӣ бо ҷомеаи ҷаҳонӣ тақвият мебахшад. Ин мавқеи устувор дар шароити афзоиши таҳдидҳои ҷаҳонӣ аҳаммияти махсус дорад. Бино бар таъкидҳои ҳамешагии Пешвои муаззами миллат дар ҷаҳони имрӯза, нооромӣ ва буҳрон дар авҷ аст, вазифаи асосии сохторҳои низомӣ ва мақомоти ҳифзи ҳуқуқ ҳифзи амнияти мардум аст. Онҳо бояд бо терроризм ва экстремизм мубориза баранд, то гурӯҳҳои ифротӣ ба ҷавонон таъсир нарасонанд ва ҷомеаро ноором насозанд.

Мо бояд дар хотир дошта бошем, ки ояндаи давлату миллат аз насли босаводу донишманд, соҳибкасбу соҳибҳунар, соҳибмаърифату соҳибфарҳанг, дур аз таассубу хурофот, ватандӯсту ватанпараст ва дорои ҳисси баланди худшиносии миллӣ вобастагии амиқ дорад.

Конфронс бо мубодилаи афкор анҷом пазируфт.