Таҳти ин унвон дар Муассисаи давлатии таълимии «Коллеҷи информатика ва техникаи компютерии шаҳри Душанбе» дар асоси нақшаи чорабиниҳои муассисавӣ конференсияи ҷумҳуриявии илмӣ – амалӣ бахшида ба 30-юмин солгарди таъсисёбии Ҳизби Халқии Демократии Тоҷикистон баргузор гардид.

Дар конференсия муовини якуми Раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон Давлатзода Баҳрулло Раҳмон, муовини Раиси шаҳри Душанбе, Одилзода Дилбар Раҳим, Раиси Кумитаи Иҷроияи Ҳизби Халқии Демократии Тоҷикистон дар шаҳри Душанбе Мирзозода Иброҳим Холмурод, Раиси Кумитаи иттифоқҳои касабаи мустақили Тоҷикистон Неъматзода Маликшо Маҳмадшо, вакили Маҷлиси намояндагони Маҷлиси Олии Ҷумҳурии Тоҷикистон Гавҳар Шарофзода, Раиси Кумитаи Иҷроияи Ҳизби Халқии Демократии Тоҷикистон дар ноҳияи Фирдавсӣ Абдураҳим Шоҳиён роҳбарони муассисаҳои таҳсилоти ибтидоӣ ва миёнаи касбии шаҳри Душанбе, кормандону омӯзгорон ва донишҷӯёни муассисаи мазкур иштирок ва суханронӣ намуданд.

Конференсияро Сафарзода Ҳамза ифтитоҳ намуда, меҳмононро ба ин даргоҳи илму маърифат хайрамақдам гуфта, иброз дошт, ки дар даврони 33 соли соҳибистиқлолӣ бо ташаббус ва ибтикори Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон дар рушди соҳаи маориф корҳои зиёде ба монанди бунёди маорифи миллӣ, ворид гардидан ба фазои таҳсилоти байналмилалӣ, мактабсозӣ, таъсиси муассисаҳои таълимӣ, таҳия ва тасдиқи барномаҳои давлатӣ, фароҳам овардани беҳтарин имкониятҳо барои донишомӯзии хонандагону донишҷӯён ва шароити мусоиди корӣ барои омӯзгорон ба анҷом расонида шудааст, ки ин ҳама дастовардҳо бо фаъолияти Ҳизби Халқии Демократии Тоҷикистон иртиботи ногусастанӣ дорад.

Давлатзода Баҳрулло, ҳозиринро ба 30-юмин солгарди таъсисёбии Ҳизби Халқии Демократии Тоҷикистон таҳният гуфта, қайд намуданд, ки Ҳизби Халқии Демократии Тоҷикистон ҳамчун як нерӯи бузурги сиёсӣ, созанда, бунёдкор ва пешбарандаи ҷомеа дар тӯли 30 соли фаъолияти худ баҳри рушди давлат, мустаҳкамнамоии пояҳои сиёсии он, пешрафти ҷомеа ва баланд бардоштани сатҳи некуаҳволии мардум корҳои назаррасеро анҷом дода, маҳз бо кӯшишҳои пайгиронаи Пешвои миллат муҳтарам Эмомалӣ Раҳмон сулҳу суббот, ваҳдати миллӣ дар кишвар таъмину пойдор гардид, заминаҳои воқеӣ ва мустаҳкам баҳри бунёди пояҳои давлатдории муосир ва инкишофи бемайлони ҷомеа гузошта шуд, ки боиси падид омадани як давлати воҳид, рӯ ба инкишоф ва дар низоми байналмилалӣ соҳибмақом гардид.

Инчунин, Одилзода Дилбар зимни баромади худ иброз доштанд, ки мо таъсисёбии Ҳизби Халқии Демократии Тоҷикистонро низ ба сифати дастоварди бузурги сиёсии даврони соҳибистиқлолии мамлакат метавон арзёбӣ намуд, зеро ин Ҳизб бо мақсади таҳкими давлатдории навин ва таъмини ҳуқуқу озодиҳои инсону шаҳрванд ба фазилатҳои баланди сиёсӣ, сифатҳои наҷиби ахлоқи ва маърифати пурсамари маънавии аъзояш такя намуда, кушишу ѓайрат ва донишу идроки онҳоро барои мустаҳкам намудани истиқлолияти сиёсию иқтисодӣ, иҷтимоӣ ва фарҳангии Ҷумҳурии Тоҷикистон сафарбар намоем.

Ҳамзамон, Мирзозода Иброҳим, дар баромади худ қайд намуданд, ки Ҳизби Халқии Демократии Тоҷикистон, ки имсол мо бо як саммимият ва шукӯҳу шаҳомат 30 – юмин солгарди таъсисёбии онро дар фазои сулҳу суббот, ваҳдати комил ҷашн мегирем, воқеъан 30 - соли фаъолияти Ҳизби Халқии Демократии Тоҷикистон дар таърихи муосири кишвар ҳамчун давраи пурмаҳсул ва сарнавиштсоз сабт шудааст. Ин ҳизби бунёдкору созанда, ки соли 1994 бо ташаббус ва ибтикори Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъсис ёфт, ҳадафи асосии худро дар таҳкими сулҳу суббот, пешрафти иҷтимоию иқтисодӣ ва боло бурдани сатҳи зиндагии шоистаи мардуми шарифи Тоҷикистон мебинад.

Неъматзода Маликшо, иштирокунандагони конференсияи сатҳи баландро ба 30-юмин солгарди таъсисёбии Ҳизби Халқии Демократии Тоҷикистон табрику муборакбод намуда, вобаста ба Нақши Ҳизбии Халқии Демократии Тоҷикистон дар рушди давлатдории навини тоҷикон, рилосати амалисозии ормонҳои миллӣ ва хизматҳои шоёни Раиси муаззами ҳизб муҳтарам Эмомалӣ Раҳмон ибрози андеша намуданд.

Ҳамзамон, Гавҳар Шарофзода вобаста ба нақши Ҳизби Халқии Демократии Тоҷикистон дар пешбурди фаъолияти сиёсати иқтисодию иҷтимоӣ ва илмию фарҳангии кишвар ибрози андеша намуда, мавсуф қайд намуданд, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон дар пешбурди сиёсати иқтисодию иҷтимоӣ ва илмию фарҳангии кишвар нақши калиди дошта, дар ташаккули эъмори давлатдорӣ ва рушди минбаъдаи он хизматҳои шомилу шоистаеро ба сомон расондааст.

Абдураҳим Шоҳиён, зимни суханронии худ аз хизматҳои шоёни Пешвои муаззами миллат муҳтарам Эмомалӣ Раҳмон дар рушду тарақиёти Тоҷикистон ёдовари намуда, иброз дошт, ки маҳз бо талошу ҷонбозиҳои Раиси муаззами Ҳизби Халқии Демократии Тоҷикистон оташи ҷанги таҳмилии шаҳрвандӣ хомуш гардида, кишварро аз парокандашавӣ ва давлатро аз нестшавӣ наҷот доданд.

Дар фарҷоми конференсияи имрӯза як қатор донишҷӯёни камбизоат, маъюбон ва ятимони кул туҳфаҳо, инчунин ба кормандону омӯзгорони муассиса Сипосномаву Ифтихорномаҳо тақдим карда шуд.

Имрӯз дар Муассисаи давлатии таълимии «Коллеҷи омӯзгории шаҳри Турсунзода» маросими расмии ифтитоҳи таҳсилоти фарогир бо иштироки Сафири Фавқулода ва Мухтори Ҷопон дар Ҷумҳурии Тоҷикистон Тошиҳиро Аики, Бобоҷон Маҳмадализода, сардори раёсати таҳсилоти миёнаи касбии Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон, намояндагони Мақомоти иҷроияи ҳокимияти давлатии шаҳри Турсунзода ва роҳбарони як қатор муассисаҳои таҳсилоти миёнаи касбӣ баргузор гардид.

Зимни чорабинии мазкур Сафарзода Хуршед Ҳайдар, директори муассисаи таълимӣ, номзади илмҳои филологӣ, иброз дошт, ки татбиқи лоиҳаи “Рушди таҳсилоти фарогир барои кӯдакони дорои имконияти маҳдуд” дар асоси розигии мақомоти ваколатдори давлатӣ дар ҳамкорӣ бо Ассотсиатсияи кӯмак ва дастгирии Ҷопон дар муассисаи таълимӣ ба роҳ монда шуд. Дар ин замина, миёни муассисаи таълимӣ ва ташкилоти мазкур Ёддошти тафоҳум ба имзо расида, ҷиҳати пешбурди низоми таҳсилоти фарогир як қатор шароитҳо, аз ҷумла бунёди бинои ёрирасон ва муҳити бемонеа фароҳам оварда шуд.

“Дар доираи татбиқи лоиҳаи мазкур омӯзгорони Коллеҷи омӯзгории шаҳри Турсунзода бо курсҳои омӯзишӣ ва такмили ихтисос фаро гирифта шуда, ҳамчун мутахассисон ва мураббиёни соҳаи таҳсилоти фарогир аз нозукиҳои кор бо шахсони дорои маъюбият огоҳӣ пайдо намуданд. Дар баробари ифтитоҳи низоми таълими инклюзивӣ ашхоси дорои маъюбият метавонанд бо истифода аз имкониятҳои фароҳамшуда дар муассисаи таълимӣ бемамониат бо таҳсил фаро гирифта шаванд”, - гуфт директори муассиса.

Таъкид шуд, ки сиёсати давлатӣ дар Ҷумҳурии Тоҷикистон нисбат ба ашхоси дорои маъюбият дар асоси принсипҳои риояи ҳуқуқу озодиҳои инсон, манъ будани табъиз нисбат ба онҳо, таъмини дастрасии шахсони дорои маюбият ба таҳсил, тавонбахшӣ, баробарҳуқуқӣ ва ҳамкории мақомоти дахлдори давлатӣ амалӣ мегардад.

Дар рафти чорабинӣ зикр шуд, ки раванди солимгардонии маъюбон ва дастгирии иҷтимоии табақаҳои ниёзманд таҳти таваҷҷӯҳи хосаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон қарор дошта, ҷиҳати дастрасии қишри осебпазири ҷомеа ба хизматрасониҳои иҷтимоӣ тадбирҳои саривақтӣ андешида мешавад. Ба роҳ мондани раванди низоми таҳсилоти фарогир дар муассисаҳои таълимӣ аз ҷумлаи ғамхориҳои роҳбарияти олии давлату Ҳукумат буда, ба таъмини баробарҳуқуқии шахсони дорои маъюбият ва соҳибмаърифат гардидани онҳо мусоидат менамояд.

Дар идома меҳмонон бо шароити китобхона, иншооти маишӣ ва дигар маҷмӯаҳои ёрирасони муассиса шинос шуданд.

Баъд аз имзои муҳимтарин санади сарнавиштсози миллӣ - Созишномаи умумии истиқрори сулҳ ва ризоияти миллӣ бо вуҷуди душвориҳои бузург ва монеаҳои роҳи сулҳу оштӣ, давлати мо таҳти сарварии Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон тавонист фазои орому осударо дар кишвар таъмин намояд. Ин фазо барои фаъолияти сиёсӣ низ шароити муҳим ба вуҷуд овард.

Дар кишвар дар асоси Конститутсияи Ҷумҳурии Тоҷикистон ва қонунҳои амалкунанда, ки ба меъёрҳои байналмилалӣ мутобиқ гардонида шуданд, раванди фаъолияти бисёрҳизбӣ ба чаҳорчӯби қонун мувофиқ гардида, қадамҳои муҳим ба сӯи ҷомеаи демократӣ ва шаҳрвандӣ гузошта шуд.

Яке аз ин ҳизбҳое, ки дар пешрафт ва тараққиёти Тоҷикистони азиз нақши бузург ва созгор дорад, ин Ҳизби Халқии Демократии Тоҷикистон мебошад. Дар воқеъ, ин ҳизб, ҳизби адолатпарвар, саодатпарвар ҳизбест, ки дар саргаҳи он Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон меистанд. Ҳизби Халқии Демократии Тоҷикистон аз рӯзҳои аввали таъсисёбиаш ҳамчун ҳизби созандаву бунёдкор, барномаи худро дар асоси манфиатҳои халқ ва эҳтиром гузоштан ба арзишҳои миллӣ амалӣ намуда, дар ҷомеа маҳбубият ва мақоми хоса пайдо намуд.

Донистани сабабҳо ва таърихи ташаккули ҳизби созандаву хайрхоҳи демократии Тоҷикистон барои ҳар як аъзои он аз манфиат холӣ нест. Ишораи аз ҳама рӯшани сабаби ташаккули ҲХДТ суханони сарвари давлат Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад, ки дар аввалҳои фаъолияти ҲХДТ чунин гуфта буданд: «Таърих гувоҳ аст, сиёсатмадороне, ки мехоҳанд дар кишвари худ ислоҳоти куллӣ гузаронанд, бояд қабл аз татбиқи барномаи стратегии худ ҳамсафон ва ҳаммаслақони худро ёбанд».

Аз оғози фаъолияти худ ҲХДТ манфиатҳои халқро дар маркази диққати худ қарор дода, барои ҳаллу фасли мушкилоти онҳо талош варзид. Ҳимояи ҳуқуқу озодиҳои шаҳрвандон ва ҳалли мушкилоти иҷтимоӣ-иқтисодии мардум аз ҷумлаи вазифаҳои асосии худ мешуморад.

Роҳбари муаззами ҳизб муҳтарам Эмомалӣ Раҳмон дар яке аз суханрониҳои худ зарурати ташкили ҳизбро ба таври мушаххас чунин таъкид намуданд: «Тавре дар хотир доред, ҳанӯз дар давраи бисёр мураккабу сарнавиштсоз - замоне, ки кишвари мо дар оташи ҷанги таҳмилии шаҳрвандӣ месӯхт ва мардум интизори паёми сулҳ буданд, зарурати таъсис додани ҳизби сиёсие пеш омад, ки бояд фарогири назару андешаҳои гурӯҳҳои мухталифи ҷомеа бошад. Дар ин замина, тарҳи Ҳизби Халқии Тоҷикистонро, ки баъдтар вобаста ба таҳаввулоти сиёсии ҷомеа онро Ҳизби Халқии Демократии Тоҷикистон номидем, омода сохтем ва фикр мекунам, ки иштибоҳ накардем…».

Сарвари муаззами ҳизб тавонистанд дар як муддати кӯтоҳ тараққиёти ҳама гуна шохаҳои ҳокимиятро ба маҷрои муайян дароварда, сатҳи некӯаҳволии мардумро боло бардоранд. Бо сарварии Пешвои миллат муҳтарам Эмомалӣ Раҳмон Ҳизби Халқии Демократии Тоҷикистон ба ҳизби адолатпарвар, бунёдкор ва муттаҳидкунандаи ҷомеа табдил ёфта, шумораи аъзоёни он аз ҳисоби донишмандону меҳансолорон ва бомасъулият зиёд гардида истодааст.

Дар воқеъ, таҷрибаи 30-солаи фаъолияти Ҳизби Халқии Демократии Тоҷикистон нишон медиҳад, ки он ҳизби мардумӣ буда, ҳамеша дар тамоми самтҳои ҳаёти ҷомеа фаъолияти назаррас дорад. Ин фаъолияти назарраси ҳизб пеш аз ҳама аз иродаи Роҳбари муаззами он муҳтарам Эмомалӣ Раҳмон маншаъ мегирад. Шиори барномаи ҳизбро «Барои ваҳдати миллӣ, сулҳу оромӣ, суботи сиёсӣ, созандагиву ободонӣ, рушди устувори иқтисодӣ ва зиндагии шоистаи мардум» ташкил медиҳад, ки барҳақ амалан тасдиқи худро ёфта истодааст.

Имрӯз аъзо будан ба ҲХДТ ва фаъолияти назаррас нишон додан дар татбиқи ҳадафҳои созандаи барномавии он шарафи бузургест. Бо боварии комил метавон гуфт, ки ҲХДТ таҳти роҳбарии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати бунёди ҷомеаи ҳуқуқбунёду адолатпарвар қадамҳои устувор гузошта, дар таҳкими суботи сиёсӣ ва ваҳдати миллӣ нақши калидӣ дорад.

Имрӯз фаъолияти назарраси ҲХДТ-ро мо пеш аз ҳама дар баргузории чорабиниҳои муҳимми сиёсӣ мушоҳида карда метавонем. Дар сохтори бисёрҳизбӣ ва ҷомеаи демократӣ имрӯз ҳамон ҳизби сиёсие пирӯз гардида соҳиби мақому мартабаи хосса мешавад, ки барномаи он фарогир аз манфиатҳои тамоми ҷомеа бошад.

Мазмуну муҳтавои барномаи Ҳизби Халқии Демократии Тоҷикистон фарогир аз манфиатҳои мардумӣ буда, муҳтавои асосиашро дар умум амалӣ гардидани ҳадафҳои стратегии давлату миллат ташкил медиҳад. Нақши ҲХДТ дар амалӣ намудани барномаҳои стратегии давлату ҳукумат дар бахшҳои иқтисоду сиёсату илму фарҳанг, баланд бардоштани маърифати сиёсию ҳуқуқии мардум, беҳдошти рӯзгори сокинони ҷумҳурӣ ва ғайра хеле калон мебошад.

Ҳизби Халқии Демократии Тоҷикистон ҳамчун ташкилоти бузурги сиёсӣ мактаби омодасозии кадрҳои роҳбарикунанда буда, дар ҳамаи шаҳру ноҳияҳо, вилоятҳо ва ҷумҳурӣ фаъолияти густурда доранд.

Ҳар як аъзои ҳизбро зарур аст, ки кору фаъолияти худро дар асоси дастуру ҳидоятҳои Раиси муаззами Ҳизби Халқии Демократии Тоҷикистон, Пешвои миллат муҳтарам Эмомалӣ Раҳмон дуруст ба роҳ монда, нерӯи худро барои ояндаи дурахшони кишвари маҳбуб равона намоянд ва содиқонаву софдилона меҳнати пурсамару созанда дошта бошанд.

Дар тӯли 30 соли таърихи пурпечутоби хеш, Ҳизби Халқии Демократии Тоҷикистон ҳамчун ҳизби пешбари сиёсии мамлакат нақши муҳим ва бениҳоят арзанда дар рушди гуногунҷабҳаи Тоҷикистон иҷро намудааст. Ин ҳизби инсонпарвар ва ободгар дар солҳои аввали соҳибистиқлолӣ ваҳдати миллиро муҳофизат ва сулҳу суботро таъмин намуд, пас аз он бошад, дар роҳи рушди иҷтимоӣ-иқтисодӣ ва таҳкими давлатдории миллӣ талошҳои шоёнро ба харҷ дод.

Дастовардҳои назарраси ҲХДТ дар тӯли ин солҳо ҳамчун офтоби равшан пеши назари ҳама қарор доранд. Ин ҳизб тавонист дар тӯли се даҳсола, мафкураи инсонпарварӣ, ватандӯстӣ ва дилсӯзиро ҳамчун арзишҳои асосии фаъолияти хеш пайгирӣ ва татбиқ намояд. Дар ин раванд, ҲХДТ дар ҳифзи сулҳу ваҳдати миллӣ, таҳкими давлатдорӣ, рушди иҷтимоӣ-иқтисодӣ ва фарҳангӣ нақши марказӣ дорад.

Новобаста аз мушкилиҳо ва имтиҳонҳои гуногун, ҲХДТ дар тӯли ин солҳо тавонист мавқеи устувори худро дар байни ҳизбҳои сиёсии Тоҷикистон нигоҳ дошта, дастовардҳои назарраси худро дар ҳамаи соҳаҳои ҳаёти ҷамъиятӣ ба даст оварад. Аз ин рӯ, Ҳизби Халқии Демократии Тоҷикистон ҳамчун ҳизби инсонпарвар ва ободгари мамлакат дар оянда низ мавриди эҳтиром ва ҳимояти мардум қарор хоҳад гирифт.

Зарифбой ҲУСЕЙНОВ,

муовини директор оид ба таълими

Коллеҷи омӯзгории шаҳри Кӯлоб

Имрӯз дар Коллеҷи муҳандисию омӯзгории шаҳри Душанбе бо иштироки Давлатзода Баҳрулло Раҳмон, муовини якуми Раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон, Абдураҳим Шоҳиён, раиси Кумитаи Иҷроияи ҲХДТ дар ноҳияи Фирдавсӣ ва Наҷибулло Рабизода, директори Коллеҷ, ҳамоиши илмӣ-сиёсӣ таҳти унвони “Нақши Ҳизби Халқии Демократии Тоҷикистон дар рушди сармояи инсонӣ ва маърифати ҳуқуқии сиёсии ҷомеа” бахшида ба 30-солагии таъсисёбии ҲХДТ баргузор гардид.

Қайд гардид, ки фаъолияти Ҳизби Халқии Демократии Тоҷикистон, ки маҳз дар замони соҳибистиқлолии кишвар арзи ҳастӣ намуд, дар роҳи расидани мардум ба субботи комил ва ваҳдату ягонагӣ хизматҳои арзанда намуд. Ин ҳизби созанда бо ташвиқи нақшаву мақсадҳои хеш дар самти таҳкими сулҳу субот, ваҳдати миллӣ, худшиносиву худогоҳӣ ва баҳри ба корҳои ободониву созандагӣ ҳидоят намудани аҳолии мамлакат саҳми муносиб мегузорад.

“Фаъолияти 30-солаи ҳизб нишон дод, ки Раиси муаззами он дар атрофи худ қувваҳои солими ҷомеаро ҷамъ ва муттаҳид карда, тавонистанд ба қалби мардум роҳ ёбанд ва Оинномаи Ҳизби Халқии Демократии Тоҷикистонро ба оинаи миллат табдил диҳанд. 30 сол дар назди таърих фурсати хеле кутоҳ аст, вале корҳои басомонрасонидаи Ҳизби Халқии Демократии Тоҷикистон метавонад барои садсолаҳои дигар ба мардум намуна бошад”, - таъкид шуд дар ҳамоиш.

Зикр шуд, ки фаъолияти Ҳизби Халқии Демократии Тоҷикистон барои бунёди давлатӣ соҳибихтиёр, демократӣ, ҳуқуқӣ, дунявӣ, ягона ва самти иҷтимоӣ дошта, аз лиҳози иқтисодӣ тараққиёбанда ва беҳдошти сифати ҳаёти мардум равона шудааст. Ҳизби мазкур бо мақсади таъмини ҳуқуқу озодиҳои инсон ва шаҳрванд ба хиради олии сиёсӣ, сифатҳои ҳамидаи ахлоқӣ ва маънавиёти баланди аъзои худ такя намуда, донишу маҳорати онҳоро ба амалӣ гардонидани ғояҳои сиёсӣ ва ҳадафҳои барномавии хеш сафарбар менамояд. Ҳамчунин, ба таҳкими истиқлоли сиёсӣ, иқтисодӣ, иҷтимоӣ ва фарҳангии мамлакат мусоидат мекунад.

Дар анҷоми ҳамоиш ба як қатор фаъолони муассиса ва ғолибони озмуну олимпиадаҳои шаҳрию ҷумҳуриявӣ Сипоснома ва туҳфаҳои молию пулӣ тақдим карда шуд.

Имрӯз дар толори Кохи Суруш маросими ҷамъбасти даври ниҳоии Озмуни ҷумҳуриявии “Малакаи касбӣ” ва қадрдонии ғолибони он баргузор гардид.

Дар маросими тантанавии супоридани туҳфаҳо ба ғолибон Мушовири калони бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Масрур Абдуллозода, Раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон Фарҳод Раҳимӣ, Сафири Иттиҳоди Аврупо дар Ҷумҳурии Тоҷикистон Раймундас Кароблис, Ҷамшед Ҷӯразода, муовини аввали вазири маориф ва илми Ҷумҳурии Тоҷикистон, муовинони Раиси Кумита, роҳбарони муассисаҳои таҳсилоти ибтидоии касбӣ ва иштирокдорони озмун иштирок намуданд.

Қабл аз маросими ҷоизасупорӣ намоиши дастовардҳои муассисаҳои таҳсилоти ибтидоӣ ва миёнаи касбӣ баргузор шуд. Дар Намоишгоҳ хонандагону донишҷӯён маҳсули дасти худро дар бахши ҳунарҳои мардумӣ ва ихтироъкорӣ ба маърази тамошо гузоштанд.

Дар қисмати тантанавии чорабинӣ нахуст Масрур Абдуллозода, Мушовири калони бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, суханронӣ намуда, таъкид кард, ки дар шароити имрӯз вобаста ба пешравиҳои илмӣ-техникӣ аз худ намудани касбу ҳунарҳои миллию муосир шарти муҳиму зарурӣ буда, барои дар бозори меҳнати дохилӣ ва хориҷӣ рақобатпазир шудани мутахассисон ва расидан ба Ҳадафҳои Рушди Устувор мусоидат менамояд. Дар ин замина, имрӯз аз ҷониби Ҳукумати мамлакат дар пайи татбиқи сиёсати созандаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонбарои аз худ кардани махсусияти истифодаи техникаву технологияи муосир ва касбу ҳунарҳои миллию муосир тамоми шароит муҳайё гардида, заминаҳои ҳуқуқӣ фароҳам оварда шудааст.

Дар идомаи чорабинӣ академик Фарҳод Раҳимӣ суханронӣ карда, зикр намуд, ки бо мақсади назорат намудани раванди таълиму тарбия дар муассисаҳои таҳсилоти ибтидоӣ ва миёнаи касбӣ ва соҳибкасб гардидани шаҳрвандон бо Қарори Ҳукумати ҷумҳурии Тоҷикистон аз 6 сентябри соли 2023, №429 Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон таъсис дода шуд. Дар назди Кумитаи мазкур имрӯз 63 муассисаи таҳсилоти ибтидоии касбӣ ва 88 муассисаи таҳсилоти миёнаи касбӣ (58 муассисаи давлатӣ ва 29 муассисаи ғайридавлатӣ) ва 5 филиал (1 давлатӣ ва 4 ғайридавлатӣ) фаъолият менамоянд, ки дар онҳо аз рўйи зиёда аз 500 ихтисос мутахассисонро омода менамоянд.

Сипас, Раймундас Кароблис, Сафири Иттиҳоди Аврупо дар Ҷумҳурии Тоҷикистон, баромад карда, зикр дошт, ки ҳамкории Иттиҳоди Аврупо бо Ҷумҳурии Тоҷикистон яке аз авлавиятҳои сиёсати хориҷии ин созмон ба шумор рафта, қолабҳои гуногуни ҳамкорӣ дар сатҳҳои дуҷониба ва бисерҷониба муносиботи ҷонибҳоро пеш мебаранд, аз ҷумла дар соҳаи маориф.

Дар чорабинӣ таъкид шуд, ки дар замони муосир новобаста аз шакл ва намуди идоракунии давлат, маҳз омӯхтани донишҳои замонавӣ, аз худ намудани касбу ҳунар, рӯй овардан ба илм ва тарбияи кадрҳо метавонад ба рушди соҳаҳои мухталиф замина гузошта, ба болоравии иқтисоди миллӣ мусоидат намояд. Вобаста ба ин Пешвои миллат муҳтарам Эмомалӣ Раҳмон борҳо таъкид кардаанд, ки аз ҳама имконият истифода карда, ҷавононро ба илму омӯзиш ҳидоят намуда, зиндагии босаодати сокинонро бояд таъмин кард.

Дар маросими тантанавӣ ба ғолибони ҷойҳои 1, 2 ва 3 аз рӯи 10 номинатсия медал, диплом ва туҳфаҳои хотиравӣ ва ба роҳбарони муассисаҳои таҳсилоти ибтидоии касбие, ки дар баргузории озмун саҳми назаррас доштанд, “Сипоснома”-и кумита тақдим карда шуд.

Қобили қайд аст, ки дар ҷомеаи муосир бо шуғли муносиб фарогирии аҳолӣ, хусусан ҷавонон яке аз воситаҳои асосии бадастоварии баробарии иҷтимоӣ ба ҳисоб рафта, дар ин замина тарбия намудани ҷавонон дар руҳияи меҳнатдӯстӣ ва фарогирии ҳарчӣ бештари онҳо ба шуғли пурмаҳсул ба мақсад мувофиқ дониста мешавад. Дар ин замина, бо ташаббуси Кумита оид ба таҳсилоти ибтидоӣ ва миёнаи касбӣ бо мақсади инкишофи шавқу завқи хонандагон, дар амалия истифода намудани донишҳои назариявӣ, тақвияти кӯшиши онҳо ба корҳои эҷодӣ, тарғиби интихоби касб, фароҳам овардани шароити муносиб барои дарёфти хонандагони лаёқатманд, тақвияти тафаккури техникии онҳо ва рушди малакаи касбӣ байни хонандагони муассисаҳои таҳсилоти ибтидоии касбӣ озмуни ҷумҳуриявии «Малакаи касбӣ»-ро аз рӯи номинатсияҳои «Барқчӣ оид ба таъмири қисмҳои барқии мошин», «Челонгар оид ба таъмири муҳаррики мошин», «Кафшергари барқию газӣ», «Ҳисобдор бо донистани компютер», «Системаи компютерӣ ва интернет-технология», «Дуредгар», «Дӯзанда», «Монтёри барқӣ оид ба таъмир ва хизматрасонии таҷҳизоти барқӣ», «Тракторчӣ-мошинисти истеҳсолоти кишоварзӣ» ва «Челонгар оид ба тайёр намудани ҷузъҳо ва қисмҳои техникӣ-санитарӣ» дар соли 2024 баргузор шуд.

Дар чорабинӣ, ҳамзамон, барномаи ҷолиби фарҳангии иборат аз рақсу таронаҳои миллию ватандӯстӣ манзури бинандагон гардонида шуд.

Ёдовар мешавем, ки даври якуми озмун аз 10 то 25 октябр дар шаҳрҳои Душанбе, Кӯлоб, Бохтар, Хуҷанд, Ваҳдат ва ноҳияи Шаҳристон баргузор шуд. Дар он аз рӯи 10 ихтисос 1000 нафар иштирок намуда, 150 нафари онҳо ба даври ҷумҳуриявии озмун роҳхат гирифта буданд. Даври ниҳоии озмун рӯзҳои 26-27 ноябри соли равон дар литсейҳои касбии техникии дӯзандагӣ, сохтмонӣ ва политехникии шаҳри Душанбе миёни хонандагони муассисаҳои таҳсилоти ибтидоии касбӣ баргузор шуд.

Имрӯз дар Коллеҷи муҳандисию омӯзгории шаҳри Душанбе Маркази омӯзиши асарҳои Пешвои миллат ва 2 озмоишгоҳи наву замонавӣ аз фанҳои тахассусии биология ва технологияи истеҳсолоти дӯзандагӣ таъсис дода шуд.

Дар рафти ифтитоҳ қайд гардид, ки аз ҷониби Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон бо мақсади арҷгузорӣ ба таърихи пурифтихори миллати тоҷик, омӯзиши амиқу ҳамаҷонибаи корнамоиҳои наҷиб ва фаъолияти шоистаи Президенти Ҷумҳурии Тоҷикистон муҳтарам Эмомалӣ Раҳмон дар роҳи наҷоти давлат, таҳкими ваҳдати миллӣ, эъмори давлати демократӣ, ҳуқуқбунёд, дунявӣ ва ягонаи Тоҷикистон дар шароити нави таърихӣ соли таҳсили 2024-2025 “Соли хониши асарҳои Пешвои миллат” эълон карда шуд ва ин марказ дар доираи ташаббуси мазкур ташкил гардида, ҳадафи он дар замири донишҷӯёни муассиса бедор намудани ҳисси худшиносии миллӣ, арҷгузорӣ ба таъриху фарҳанги миллат ва эҳтиром ба Ватан тавассути мутолиа ва омӯзиши асарҳои Сарвари давлат мебошад.

Озмоишгоҳҳои фаннии тахассусӣ дар доираи амалишавии “Бистсолаи омўзиш ва рушди фанҳои табиатшиносӣ, дақиқ ва риёзӣ дар соҳаи илму маориф” эълон шудани солҳои 2020-2040 ташкил карда шуда, бо тамоми таҷҳизоту лавозимоти зарурӣ муҷаҳҳаз буда, имкониятҳои гузаронидани корҳои озмоишӣ ва назоратиро дар раванди дарсҳои амалӣ боз ҳам беҳтар менамояд.

Таъкид гардид, ки озмоишгоҳҳои нави ҳамқадами замон низоми таълим ва раванди дарсгузариро дар муассиса ба стандартҳои ҷаҳонӣ мутобиқ гардонида, омили рушди бонизоми муассиса ва боло рафтани мавқеи он мебошад.

Дар Коллеҷи муҳандисию омӯзгории шаҳри Душанбе бо иштироки муовини якуми Раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон Давлатзода Баҳрулло Раҳмон ва директори Коллеҷ Рабизода Наҷибулло ба ятимону камбизоатоне, ки дар Коллеҷи мазкур таҳсил менамоянд либоси зимистона тақдим карда шуд.

Зимни тақдими либосҳо ба ятимон Давлатзода Баҳрулло, иброз дошт, ки дар сиёсати иҷтимоии Ҷумҳурии Тоҷикистон дастгирии табақаи ниёзманд, аз ҷумла ятимони кулл, нимятимону камбизоатон мавқеи меҳварӣ дорад. Дар даврони соҳибистиқлолии кишвар дар Ҷумҳурии Тоҷикистон ягон ятим аз лутфу меҳрубонии падаронаи Пешвои миллат муҳтарам Эмомалӣ Раҳмон бенасиб намонда, онҳо ҳамеша таҳти ҳимояи давлат ва Ҳукумат қарор доранд.

Таъкид шуд, ки ин иқдом тибқи дастури роҳбарияти Кумита амалӣ гардида, давоми мантиқии сиёсати ғамхорона ва ятимпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон амалӣ мебошад.

Дар охир қайд гардид, ки ятимону бепарасторон ва нафарони имконияташон маҳдуд дар партави сиёсати ятимпарвари Пешвои муаззами миллат бояд ҳаргиз худро яккаву танҳо ҳис накунанд ва онҳоро мебояд, дар фазои сулҳу оромӣ, бо истифода аз шароиту имконоти фаррохи илмомӯзӣ таҳсил намуда, бо маърифати баланди инсонӣ баҳри ояндаи дурахшони Ватан хизмат намоянд.

Ҳайати кории Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон таҳти роҳбарии Шарифхон Файзов, сардори шуъбаи муносибатҳои байналмилалӣ ва робита бо ҷомеа рӯзҳои 19-24 ноябри соли 2024 бо сафари хизматӣ дар шаҳрҳои Пекин ва Тянҷини Ҷумҳурии Мардумии Чин қарор доштанд.

Дар рӯзи аввали сафар Шарифхон Файзов дар мулоқот бо муовини директори генералии Ассотсиатсияи таҳсилоти касбии Чин (CVEA) ҷаноби Пэн Линго ҷиҳати муаррифии сохтор ва фаъолияти Кумита суханронӣ намуда, дар мавриди ташаббус ва талошҳои Кумита барои таҳкиму густариши низоми зинаҳои таҳсилоти ибтидоӣ ва миёнаи касбӣ дар Ҷумҳурии Тоҷикистон маълумот дод. Ҳамзамон, ӯ нақши муҳим ва муассири шарикони байналмилалӣ, аз ҷумла CVEA-ро дар самти пешрафти низоми таҳсилот дар кишвар таъкид намуда, ба тавсеаи ҳамкориҳои дуҷониба изҳори умедворӣ кард.

Ҷаноби Пэн Линго аз ҷониби худ изҳор намуд, ки бо пайравӣ аз сиёсати пешгирифтаи хирадмандонаи сарони ду кишвар барои густариши ҳамкориҳои муштарак бо ҷониби Тоҷикистон ҳавасманд мебошанд ва дар татбиқи лоиҳаву барномаҳои дуҷониба, ки ба самти рушди зинаи таҳсилоти касбӣ равона шудаанд, талош хоҳанд кард.

Дар мулоқот, инчунин, паҳлӯҳои дигари ҳамкориҳои дуҷониба, роҳҳои муассири рафъи мушкилоти ҷойдоштаи соҳа ва роҳандозии табодули донишу таҷриба байни коршиносони соҳавии ду ҷониб матраҳ гардиданд.

Мулоқоти мазкур ҷиҳати мубоҳисоти созанда, баррасии имконоти ҳамкориҳои оянда ва мубодилаи донишу таҷрибаҳои пешқадам заминаи мусоидро фароҳам овард.

Сафари ҳайат бо маросими расмии табодули тӯҳфаҳо ба анҷом расид, ки он рамзи муносибатҳои мустаҳкам ва омодагии тарафайн ба густариши ҳамкориҳои минбаъда дар соҳаи таҳсилоти касбӣ ба ҳисоб меравад.

Боздиди мазкур аҳамияти саъю талошҳои пайвастаро ҷиҳати такмили зинаи таҳсилоти касбӣ дар Тоҷикистон ва таҳкими ҳамкориҳои байналмилалӣ, ки барои рушди неруи кории оянда таъсири мусбат мерасонанд, таҷассум мекунад.

Дар рӯзи дуюми сафари расмии худ ба шаҳри Пекин ҳайати Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон дар як қатор чорабиниҳои муҳим, ки ба мустаҳкам кардани муносибатҳои шарикии Ҷумҳурии Тоҷикистон ва Ҷумҳурии Мардумии Чин дар самти таҳсилоти касбӣ равона шудаанд, иштирок намуд.

Аз ҷумла, ҳайат ҷиҳати боздид аз қароргоҳи Ташкилоти “NALIKE” (NALIKE International Education Technology), ки бо Кумита моҳи марти соли 2024 дар шаҳри Душанбе Ёддошти тафоҳуми ҳамкорӣ имзо намуда буд, сафарбар гардида, зимни мулоқот бо роҳбарияти он роҳҳои рушди минбаъдаи лоиҳаҳои муштараки соҳаи таҳсилоти касбиро баррасӣ карданд. Дар ҷараёни музокирот, инчунин, масъалаи роҳандозии навоварӣ дар соҳаи таҳсилот ва ҳалли мушкилот дар ин замина, мавриди муҳокимаи ҷонибҳо қарор гирифт.

Инчунин, ҳайат дар Семинар оид ба баланд бардоштан ва рушди малакаҳои техникӣ байни Тоҷикистон ва Баодини Чин иштирок намуд. Шарифхон Файзов бо намояндагӣ аз Кумита дар семинари мазкур суханронӣ намуда, ба вусъати доираи ҳамкориҳои муштарак дар соҳаи таҳсилоти касбӣ ва аҳамияти муҳим доштани мубодилаи донишу таҷриба ва ҳайатҳои корӣ таъкид намуд. Дар баромади худ ӯ, инчунин, ба зарурати ҳамоҳангсозии талошҳо ҷиҳати омода кардани донишҷӯён ва мутахассисон барои вокуниш нишон додан ба таҳдидҳои муосир дар соҳаи техникӣ-технологӣ ишора намуд, ки муҳиму саривақтист.

Зимни чорабинӣ байни ҳайати Кумита ва намояндагони ҳукумати маҳаллии Баодин, Идораи маорифи шаҳрии Баодин ва Коллеҷи касбӣ-техникии Баодин табодули афкор сурат гирифт. Ин мубоҳисаҳо ба ҳамдигарфаҳмии умумӣ дар самти мустаҳкам кардани ҳамкорӣ интиҳо ёфта, ҷонибҳо омодагии худро барои фаъолона амалӣ кардани лоиҳаҳои муштарак ва қонеъ гардонидани эҳтиёҷоти зинаи таҳсилоти касбӣ изҳор намуданд.

Дар интиҳои чорабинӣ маросими тақдими туҳфаҳои хотиравӣ сурат гирифта, чонибҳо аз натиҷаи семинари мазкур изҳори қаноатмандӣ намуданд.

Рӯзҳои 20-22 ноябри соли 2024 дар шаҳри Тянҷини Хитой Конфронси ҷаҳонии рушди таҳсилоти касбӣ ва техникӣ баргузор гардид, ки ҳайати Кумита барои иштирок дар чорабинии мазкур даъват гардиданд. Ин ҳамоиш дар сатҳи баланди ташкилӣ баргузор гардида, дар он намояндагони баландпояи соҳаи таҳсилоти касбии бисёре аз кишварҳои ҷаҳон иштирок намуданд. Тибқи барномаи чорабинӣ роҳбари ҳайат Шарифхон Файзов дар конференсияи “Навоварӣ - таҳкимбахши оянда, маҳоратҳо равшанбахши ҳаёти нав” роҷеъ ба мақоми Кумита, самтҳои фаъолияти он, дастовардҳои дар чанд моҳи фаъолият бадастомада ва мушкилоти соҳа суханронӣ намуд, ки аз ҷониби иштирокчиён хуб пазируфта шуд.

Дар чорабинӣ роҳбарият ва намояндагони муассисаҳои ҳамсони давлатҳои хориҷӣ ҷиҳати барқарор намудани равобиту ҳамкориҳои дуҷониба бо Кумита мароқ зоҳир намуданд.

Гуфта шуд, ки қарор аст муассисаҳои таҳсилоти миёнаи касбии ҷониби Чин дар якҷоягӣ бо Кумита моҳи апрели соли 2025 чорабинии сатҳи баландро дар мавриди рушди соҳаи таҳсилоти касбӣ ва малакаҳо баргузор намоянд, ки ин иқдом ҷиҳати муаррифии бештари Кумита мусоидат намуда, барои вусъат додани доираи ҳамкориҳои байналмилалии он замина мегузорад.

Пас аз анҷоми чорабиниҳои илмӣ санаи 22 ноябр ҳайати Кумита ба шаҳри Пекин раҳсипор гардида, барои тамошо ба мавзеъҳои таърихии шаҳри Пекин сафарбар карда шуданд.

Дар маҷмӯъ, сафари кории мазкур мусбат арзёбӣ гардида, он барои роҳандозӣ ва таҳкими робитаҳои хориҷии Кумита муфид аст.

Имрӯз, 27 ноябр, дар Кохи Суруш маросими ҷоизасупорӣ ба ғолибони даври ҷамъбастии озмуни "Малакаи касбӣ" баргузор мегардад.

Мувофиқи нақша қабл аз оғози маросими ҷоизасупорӣ дар саҳни Кохи Суруш намоиши дастовардҳои муассисаҳои таҳсилоти ибтидоии касбии шаҳри Душанбе баргузор карда мешавад .

Озмуни мазкур бо ташаббуси Кумита оид ба таҳсилоти ибтидоӣ ва миёнаи касбӣ байни хонандагони муассисаҳои таҳсилоти ибтидоии касбӣ аз рӯйи ихтисосҳои барқчӣ оид ба таъмири қисмҳои барқии мошин, челонгар оид ба таъмири муҳаррики мошин, кафшергари барқию газӣ, ҳисобдор бо донистани компютер, системаи компютерӣ ва интернет-технология, дуредгар, дӯзанда, монтёри барқӣ оид ба таъмир ва хизматрасонии таҷҳизоти барқӣ, тракторчӣ-мошинисти истеҳсолоти кишоварзӣ ва челонгар оид ба тайёр намудани ҷузъҳо ва қисмҳои техникӣ-санитарӣ гузаронида шуд .

Мақсади асосии гузаронидани озмун такмили донишҳои назариявӣ ва амалӣ, инкишофи шавқу завқи хонандагон ба корҳои эҷодӣ, тарғиби касбҳои коргарӣ, фароҳам овардани шароити муносиб барои рушди малакаи касбии хонандагон ва тақвияти тафаккури техникии онҳо мебошад.

Маврид ба зикр аст, ки 26-27 ноябр дар литсейҳои касбии политехникӣ, сохтмонӣ ва дӯзандагии шаҳри Душанбе даври ниҳоии Озмуни ҷумҳуриявии "Малакаи касбӣ" байни хонандагони муассисаҳои таҳсилоти ибтидоии касбӣ сурат мегирад .

Даври якуми озмун аз 10 то 25 октябр дар шаҳрҳои Душанбе, Кӯлоб, Бохтар, Хуҷанд, Ваҳдат ва ноҳияи Шаҳристон баргузор шуд. Дар он аз рӯи 10 ихтисос 1000 нафар иштирок намуда, 150 нафар ба даври ҷумҳуриявии озмун роҳхат гирифтанд.

ҶАРАЁНИ ДАВРИ НИҲОИИ ОЗМУНИ ҶУМҲУРИЯВИИ «МАЛАКАИ КАСБӢ» БАЙНИ ХОНАНДАГОНИ МУАССИСАҲОИ ТАҲСИЛОТИ ИБТИДОИИ КАСБӢ ДАР ЛИТСЕЙҲОИ КАСБИИ ПОЛИТЕХНИКӢ, СОХТМОНӢ ВА ДӮЗАНДАГИИ ШАҲРИ ДУШАНБЕ

Дар Литсейи касбии дӯзандагии шаҳри Душанбе бо иштироки Раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон, академик Фарҳод Раҳимӣ, муовинони раис, раиси Иттиҳодияи корфармоёни Ҷумҳурии Тоҷикистон Акрамов Айёмбек, роҳбарони муассисаҳои таҳсилоти ибтидоии касбии ҷумҳурӣ ва иштирокчиён даври ниҳоии озмуни ҷумҳуриявии «Малакаи касбӣ» баргузор гардид.

Чорабиниро Фарҳорд Раҳимӣ ифтитоҳ намуда, иброз дошт, ки озмуни ҷумҳуриявии «Малакаи касбӣ» дар доираи дастуру ҳидоятҳои Пешвои миллат Президенти Ҷумҳурии Тоҷикистон муҳтарам Эмомалӣ Раҳмон дар мавриди соҳибкасб гардонидани аҳолии мамлакат, ки дар маркази таваҷҷуҳи роҳбарияти Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон қарор дорад, гузаронида мешавад, зеро дар ҷаҳони муосир бе доштани ҳунар ва ё ихтисоси мувофиқ шахс наметавонад мавқеи худро дар ҷомеа пайдо кунад ва рӯзу рӯзгорашро пеш барад.

Озмуни мазкур бо ташаббуси Кумита оид ба таҳсилоти ибтидоӣ ва миёнаи касбӣ байни хонандагони муассисаҳои таҳсилоти ибтидоии касбӣ аз рӯйи ихтисосҳои барқчӣ оид ба таъмири қисмҳои барқии мошин, челонгар оид ба таъмири муҳаррики мошин, кафшергари барқию газӣ, ҳисобдор бо донистани компютер, системаи компютерӣ ва интернет-технология, дуредгар, дӯзанда, монтёри барқӣ оид ба таъмир ва хизматрасонии таҷҳизоти барқӣ, тракторчӣ-мошинисти истеҳсолоти кишоварзӣ ва челонгар оид ба тайёр намудани ҷузъҳо ва қисмҳои техникӣ-санитарӣ гузаронида мешавад.

Яке аз масъалаҳои муҳиме, ки Президенти кишвар зимни суханрониашон дар Рӯзи дониш ва Дарси сулҳ таъкид намуданд, ин мувофиқ ба талаботи рӯз омӯзонидани касбҳои коргарӣ ва дар ин замина соҳиби касбу ҳунар кардану ба бозори меҳнати дохилӣ ва хориҷи дуру наздик ворид намудани онҳо мебошад. Давлат ва Ҳукумати Ҷумҳурии Тоҷикистон бо мақсади фардои дурахшони наврасону ҷавонон ва тамоми шаҳрвандони кишвар барои омӯзонидани касбҳои коргарӣ ба онҳо пайваста тадбир меандешад. Бо назардошти гузариш ба низоми байналмилалӣ ва дар ин замина баланд бардоштани сифати таҳсил озмуни мазкур миёни хонандагони муассисаҳои таҳсилоти ибтидоии касбӣ гузаронида мешавад.

Мақсади асосии гузаронидани озмун такмили донишҳои назариявӣ ва амалӣ, инкишофи шавқу завқи хонандагон ба корҳои эҷодӣ, тарғиби касбҳои коргарӣ, фароҳам овардани шароити муносиб барои рушди малакаи касбии хонандагон ва тақвияти тафаккури техникии онҳо мебошад.

Маврид ба зикр аст, ки 26-27 ноябр дар литсейҳои касбии политехникӣ, сохтмонӣ ва дӯзандагии шаҳри Душанбе даври ниҳоии Озмуни ҷумҳуриявии «Малакаи касбӣ» байни хонандагони муассисаҳои таҳсилоти ибтидоии касбӣ ҷараён дорад.

Ёдовар мешавем, ки даври якуми озмун аз 10 то 25 октябр дар шаҳрҳои Душанбе, Кӯлоб, Бохтар, Хуҷанд, Ваҳдат ва ноҳияи Шаҳристон баргузор шуд. Дар он аз рӯи 10 ихтисос 1000 нафар иштирок намуда, 150 нафар ба даври ҷумҳуриявии озмун роҳхат гирифтанд.

Маросими даври ҷамъбастии озмун 27 ноябр, соати 15:00, дар Театри опера ва балети ба номи Садриддин Айнӣ баргузор мешавад. Қабл аз оғози маросими ҷоизасупорӣ дар саҳни театр намоиши дастовардҳои муассисаҳои таҳсилоти ибтидоии касбии шаҳри Душанбе баргузор мегардад.

Имрӯз дар Коллеҷи тиббии шаҳри Ҳисор Рӯзи Парчами давлатии Ҷумҳурии Тоҷикистон бо иштироки доираи васеи меҳмонон, кормандон, омӯзгорон ва донишҷӯён таҷлил гардид.

Директори коллеҷ Раҷабов Баҳодур Баҳромович қайд кард, ки Рӯзи Парчами давлатӣ на танҳо рӯзи ҷашн, балки рӯзи худогоҳии миллӣ ва қадршиносии арзишҳои истиқлол аст. Ин парчам дар саҳифаҳои таърихи миллат ҳамчун рамзи мубориза барои озодӣ ва соҳибихтиёрӣ сабт шудааст. Дирафши Коваён, ки дар гузашта ҳамчун рамзи адолат, ваҳдат ва қудрат шинохта шудааст, имрӯз бо шукӯҳи тоза дар шакли Парчами давлатии Ҷумҳурии Тоҷикистон дар фазои сулҳу ваҳдати миллӣ парафшон аст.

Сипас, мудири шуъбаи кор бо занон ва оилаи Мақомоти иҷроияи ҳокимияти давлатии шаҳри Ҳисор Васихова З. З. суханронӣ намуда, иброз дошт, ки Парчами давлатӣ на танҳо нишони истиқлоли давлатӣ ва ваҳдати миллӣ, балки рамзи фарҳангу тамаддун, орзую ормонҳои поки миллати тоҷик аст, ки бо роҳбарии хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ҷаҳониён бо шукӯҳи хоса муаррифӣ шудааст. Ин парчами муқаддас имрӯз бо саъю кӯшишҳои созандаи мардуми тоҷик дар партави сиёсати созандагӣ ва дастовардҳои беназири кишвари азизамон парафшон аст.

Дар идомаи чорабинӣ мудири бахши кор бо ҷавонон ва варзиши шаҳри Ҳисор Шуҳрат Аминов як зумра кормандон ва омӯзгорони муассисаро барои мусоидати фаъол дар татбиқи босамари сиёсати давлатии ҷавонон, нишон додани эҳсоси баланди худшиносиву ватандӯстӣ, эҳтиром гузоштан ба арзишҳои миллӣ, таҳкими рукнҳои давлатдорӣ бахшида ба Рӯзи Парчами давлатии Ҷумҳурии Тоҷикистон бо сипоснома қадрдонӣ намуданд.

Дар интиҳои чорабинӣ донишҷӯёни фаъоли муассиса барномаи фарҳангии ҷолибро манзури ҳозирин гардониданд.

21 ноябри соли равон дар Китобхонаи миллии Тоҷикистон бахшида ба 30-солагии таъсисёбии Ҳизби Халқии Демократии Тоҷикистон конференсияи байналмилалии илмӣ-амалӣ дар мавзӯи “Нақши Ҳизби Халқии Демократии Тоҷикистон дар ташаккули давлатдории миллӣ” доир гардид.

Дар интиҳои кори конференсия ҳамчун рамзи қадрдонӣ ба чанде аз фаъолони ҳизб, ки дар амалӣ гардидани ҳадафҳои Оиннома ва барномаҳои ҳизб ва ба муносибати 30 - солагии Ҳизби Халқии Демократии Тоҷикистон саҳми арзанда мегузоранд, сипосномаи Ҳизби Халқии Демократии Тоҷикистон тақдим гардид. Аз ҷумла, Игамова Ирода, директори Коллеҷи омӯзгории ноҳияи Зафаробод, бо “Сипоснома”-и ҲХДТ қадрдонӣ шуд.

24 ноябри соли 2024, шаҳри Душанбе

Ҳамватанони азиз!

Ҳамаи шуморо ба ифтихори Рӯзи парчами давлатӣ, ки рамзи соҳибихтиёрӣ, ваҳдату ягонагӣ ва сарфарозии миллати куҳанбунёдамон мебошад, самимона табрик мегӯям.

Ойини парчамдории халқи мо дар масири таърихи чандинҳазорсолаи он умеду ормон ва дастовардҳои мардуми сарбаланди мо, яъне давраҳои гузаштаи давлатдории тоҷикон ва даврони соҳибистиқлолии Тоҷикистони навинро таҷассум менамояд.

Тасвиру хусусиятҳои хоси Дирафши Ковиён, ки ҳоло дар Ливои Президенти Тоҷикистон ҳамчун рамзи пойдории давлатдории миллии мо инъикос ёфтаанд, таҷассумгари асолату ҳувияти миллӣ ва нангу номуси тоҷикон ҳамчун миллати тамаддунсоз ва соҳиби таърихи бостонӣ ба шумор мераванд.

Парчами давлатӣ дар раванди бунёди давлатдории навин нишонаи возеҳи соҳибдавлатии миллат, мояи ифтихори шаҳрвандон ва омили муҳимтарини иттиҳоду сарҷамъии мардум ба хотири ҳимояи истиқлолу озодии Ватан ва илҳомбахши ҳар як фарди ҷомеа барои заҳмати содиқона ба хотири фардои ободу осуда мебошад.

Хусусан, дар вазъи мураккабу пешгӯйинашавандаи ҷаҳони имрӯза Парчами давлатии мо ба рамзи ҳувияти миллӣ, садоқат ба Ватан, ҳифзи марзу буми он ва ҳимояи манфиатҳои давлату миллат табдил ёфтааст.

Сатрҳои «Зи дурии замонаҳо расидаем, ба зери Парчами ту саф кашидаем», ки дар Суруди миллии кишвар садо медиҳад, дар замири ҳар як шахси огоҳу бедордил хотираи пур аз ифтихори таърихӣ ва эҳсоси садоқат ба ойину анъанаҳои деринаи миллиро бедор месозанд.

Тайи 33 соли истиқлоли давлатӣ мо тавонистем, ки маҳз таҳти Парчами миллии худ раванди эъмори давлати пояндаи хешро бар пояи арзишу суннатҳои миллӣ вусъат бахшем.

Чанд рӯз пеш мо 30-юмин солгарди қабули нахустин Конститутсияи Тоҷикистони соҳибихтиёрро ботантана таҷлил намудем, ки дар он Парчам ҳамчун яке аз рамзҳои муқаддаси давлатӣ, нишонаи ҳастӣ ва пойдории давлатдории миллии тоҷикон дарҷ гардидааст. Яъне Парчам дар радифи Суруди миллӣ ва Нишони давлатӣ аз ҷумлаи муқаддасоти миллии мо мебошад.

Дастовардҳои замони соҳибистиқлолии кишвар баёнгари воқеияте мебошанд, ки мардуми шарафманди тоҷик таҳти Парчами давлатии худ имкони ба таърихи гузашта ва мазмуну моҳияти воқеии давлатдории навини хеш бо чашми ибратомӯз ва диди нав назар намуданро пайдо карданд.

Маҳз дар заминаи чунин ҷанбаҳои ибратомӯзи таърихи пурифтихори худ мо ба сӯйи ояндаи дурахшони давлат, Ватан ва халқи ободгару созандаамон бо эътимоди қавӣ ва қадамҳои устувор пеш рафта истодаем.

Ба ин маънӣ, ойини парчамдории мо ҳамчун суннати пайвандгари наслҳо ва омили иттиҳоду сарҷамъии сокинони мамлакат умри ҷовидонӣ хоҳад дошт.

Ҳамватанони арҷманд!

Имрӯз Тоҷикистони маҳбуби мо таҳти парафшонии Парчами давлатии худ дар арсаи байналмилалӣ ҳамчун кишвари ташаббускору сулҳдӯст муаррифӣ гардида, ҷомеаи ҷаҳонӣ ибтикороти моро ба хотири ҳалли мушкилоти глобалӣ, аз ҷумла обу иқлим ва дигар масъалаҳои мубраму доѓи рӯз дастгирӣ мекунад.

Ҳоло Парчами давлати соҳибистиқлоли Тоҷикистон дар радифи парчамҳои давлатии дигар кишварҳои олам дар созмонҳои бузурги байналмилалӣ парафшон мебошад, ки дар баробари эҳсоси ифтихор масъулияти ҳар як фарди ҷомеаро баланд мебардорад. Аз ин лиҳоз, эҳтироми Парчами давлатӣ ва дигар муқаддасоти миллӣ ҳамчун рамзҳои муқаддаси давлати соҳибистиқлол аз ҷумлаи вазифаҳои пурифтихор ва қарзи виҷдониву инсонии ҳар як шаҳрванд дар дохил ва хориҷ аз кишвар ба ҳисоб меравад.

Арҷгузорӣ ба Парчами давлатӣ аз ҷониби сокинони кишвар, ба таври шоиста ва дар ҷойҳои муносиб афрохтани он, аз ҷумла дар кӯчаву хиёбонҳои шаҳру ноҳияҳо, муассисаҳои таълимӣ, иншооту биноҳои маъмуриву хизматрасонӣ, хатти марзи сарҳади давлатӣ, инчунин, дар манзилҳои истиқоматӣ нишонаи ифтихор аз давлату давлатдории навини тоҷикон мебошад.

Мо ба фарзандони худ ҳанӯз аз хурдсолӣ бояд ҳамеша талқин намоем, ки парчами давлатӣ шарафи инсонӣ, нангу номуси миллӣ ва рӯйи сурху сари баланди ҳар як фарди ҷомеа ба ҳисоб меравад.

Хотирнишон месозам, ки мо таҳти Парчами давлатӣ ба дастовардҳои бузург, аз ҷумла ваҳдати миллӣ ва даврони созандагӣ расидем ва минбаъд низ бо ҳамин рамзи муқаддас сиёсати созандагиву бунёдкоронаро ба хотири баланд бардоштани сатҳу сифати зиндагии ҳар як хонадони мардуми кишвар, бунёди ҷомеаи адолатпарвар, озоду демократӣ ва ҳуқуқбунёду дунявӣ пеш хоҳем бурд.

Бори дигар тамоми ҳамватанони азизро ба ифтихори Рӯзи парчами давлатӣ самимона табрик гуфта, орзумандам, ки ин рамзи муқаддаси Тоҷикистони соҳибистиқлол бар сари давлату миллати шарафманду сарбаланди тоҷик ба таври ҷовидона парафшон бошад ва моро ба сӯйи ояндаи ободу осуда раҳнамун созад.

Рӯзи Парчами давлатӣ муборак бод, ҳамватанони азиз!

22 ноябр Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар шаҳри Санкт-Петербург дар кори ҷаласаи 57-уми пленарии Ассамблеяи Байнипарламентии давлатҳои иштирокчии Иттиҳоди Давлатҳои Мустақил иштирок ва суханронӣ намуданд.

Дар кори ҷаласа, ҳамчунин, раисони парламентҳо ва ҳайатҳои парламентии ҷумҳуриҳои Арманистон, Беларус, Қазоқистон, Қирғизистон, Озарбойҷон, Ӯзбекистон ва Федератсияи Россия иштирок намуданд.

Зимни суханронӣ Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ нахуст ба ҷониби Россия барои пазироии самимӣ ва анҷоми раёсати бобарори ин ҷониб дар Иттиҳоди Давлатҳои Мустақил изҳори сипос намуданд.

Сипас, тибқи рӯзномаи ҷаласаи пленарӣ муҳтарам Рустами Эмомалӣ дар бораи нақши институти мушоҳидаи байналмилалии интихобот дар рушди демократия ва ҳифзи соҳибихтиёрии давлатии кишварҳои Иттиҳоди Давлатҳои Мустақил андешаҳои худро иброз намуданд.

Зикр карда шуд, ки мушоҳидаи байналмилалии равандҳои интихобот ва раъйпурсӣ аз муҳимтарин унсурҳои ҳамкории сиёсиву ҳуқуқии байни кишварҳо ба ҳисоб рафта, нақши он дар такмили танзими ҳуқуқӣ ва заминаи қонунгузории миллии омодагӣ ва гузаронидани интихоботҳо, назаррас аст.

Дар идомаи кори ҷаласаи 57-уми пленарии Ассамблеяи Байнипарламентии давлатҳои иштирокчии Иттиҳоди Давлатҳои Мустақил оид ба масъалаҳои дигари рӯзнома мубодилаи афкор сурат гирифта, қарорҳои дахлдор қабул карда шуданд.

www.majmilli.tj

“Парчами миллӣ яке аз рамзҳои муҳими Истиқлолияти миллӣ ва давлатдории муосири мо, таҷассумгари асосҳои таърихӣ ва рамзҳои давлатдории гузаштаи тоҷикон, инчунин ифодакунандаи мақсаду маром ва орзуву ормонҳои тамоми мардуми Тоҷикистон мебошад”.

Эмомалӣ Раҳмон

Дар идомаи 32-солагии таҷлили Иҷлосияи ХVI тақдирсози миллат бо муҳаббат ва самимият ҷашн гирифтани Рӯзи Парчами давлатии Ҷумҳурии Тоҷикистон, пеш аз ҳама, арҷ гузоштан ба таърихи парчамдории аҷдодон ва таҷассумгари мақсаду мароми мо дар роҳи эъмори давлати мустақилу соҳибихтиёр аст.

Имрӯз халқи тоҷик ва тамоми тоҷикистониён дар қатори мардуми сарсари давлатҳои сайёра бо шукргузорӣ аз даврони Истиқлол ва фазои орому осуда зери Парчами миллӣ ба меҳнати фидокорона барои сарсабзию шукуфоии диёр саҳм гузошта, аз сиёсати ояндасози давлати ҳукумат ва Сарвари хирадманди худ Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон пуштибонӣ мекунанд.

Мо огоҳ ҳастем, ки дар Иҷлосияи сарнавиштсози ХVI Шӯрои Олии Ҷумҳурии Тоҷикистон (1992) дар баробари ба ҷаҳониён эълон доштани барқарор шудани ҳокимияти конститутсионӣ се муқаддасоти давлатдорӣ, се рамзи ҳастӣ ва соҳибихтиёрии давлату миллат – Парчам, Нишон ва Суруди миллӣ қабул карда шуданд.

Дар таърихи ҷаҳон парчам аз давраҳои қадим ҳамчун рамзи давлатдорӣ истифода мешуд. Парчами давлатии Тоҷикистон ба ин маъно ифодагари мақсаду маром ва таҷассумгари давлатдории миллати куҳантаърихи мост. Аз ин лиҳоз чуноне ки Сарвари давлат, таъкид намуданд: «Парчами имрӯзаи давлати яке аз рамзҳои муҳими истиқлолияти миллӣ ва давлатдории муосири мо, таҷассумгари асосҳои таърихӣ ва размҳои давлатдории тоҷикон, инчунин ифодакунандаи мақсаду мааром ва орзуву ормонҳои таъмоми мардуми Тоҷикистон мебошад».

Дар доираи меъёрҳои Конститутсияи Ҷумҳурии Тоҷикистон Парчам, Нишон ва Суруди миллӣ рамзҳои асосии давлат мебошанд. Дар ин замина, эълон шудани Рӯзи Парчами Ҷумҳурии Тоҷикистон воқеаи фараҳбахш буда, баргузории он дар замири ҳар фарди ватандӯст ва сокини Тоҷикистони азиз эҳсоси дӯст доштан ва парастиш кардани ин марзу бумро дучанд менамояд.

Парчами миллии имрӯзаи давлатӣ Тоҷикистон ҳамчун рамзҳои дигари давлатӣ намоди истиқлолият ва соҳибихтиёрии давлат буда, симои воқеӣ ва таърихии онро дар намуди ба худ хос инъикос мекунад. Дар он тасвири рангҳои сурх, сафед ва сабз, талошу мубориза ва саъю кӯшиши халқи тоҷикро баҳри озодиву истиқлол, худшиносию меҳанпарастӣ ва ихтиёр намудани зиндагии орому осоишта, арзандаю поянда, осудаву устувор ифода мекунад. Он рукни асосии муқаддасоти миллӣ ба шумор меравад.

Қобили таъкид аст, ки бо дидани парчам ифтихори ватандорӣ ва эҳсоси масъулияти ҳар як шаҳрванд дар назди Ватан боло мегардад, зеро дар тамоми кишварҳои ҷаҳон аз ҷониби шаҳрвандон нисбат ба рамзҳои давлатӣ садоқату эҳтиром зоҳир карда мешавад.

Агар ба таърих назар кунем, сарчашмаҳои таърихӣ ишорат бар он доранд, ки калимаҳои “парчам”, “алам”, “дирафш” ва “байрақ” дар миёни аҷдодони мо аз қадим маълум ва машҳур буда, чун рамзи давлатӣ корбурд шудаасту дар гузашта дар баробари давлат лашкаркашону сипоҳиёни номдор парчами худро доро буданд. Аз ин рӯ, парчам таърихи хеле қадим дорад.

Дар аксари сарчашмаҳои қадими гуногун мазмун оид ба «Диравши ковиёнӣ» маълумот оварда шудааст. Ба андешаи таърихнигорон аввалин намунаҳои парчам дар хиттаи фарҳангу тамаддуни ориёӣ дониста шудааст. Масалан дар «Авасто», ки сарчашмаи қадима ба ҳисоб меравад, дар бораи парчам ва тарзи истифодаи он иттилои бисёр муфид омадааст ва бо таъсири он баъзе ҷиҳатҳои таърихии ин масъала дар асари безаволи Ҳаким Абулқосим Фирдавсӣ - «Шоҳнома» ва дигар осори таърихиву адабӣ акс ёфтаанд.

Ҳамин тавр, парчам ифтихор аз сарбаландии миллат аст ва он дар замони Истиқлолияти давлатии Чумҳурии Тоҷикистон чун рамзи баҳамоии миллат шинохта шуда, он дар мамолики хориҷӣ ҳангоми ғолибият дар мусобиқаҳои варзишӣ афрохта мешавад.

Имрӯз бо итминони комил метавон гуфт, ки мардуми тоҷик ва сокинони Тоҷикистони азиз, зери парчами давлати худ манфиатҳои умумимиллиро ба даст оварда, ба устувории истиқлолияти давлатӣ, ҳифзи якпорчагии Ватан, забону фарҳанг, муносибатҳои пешрафтаи ҷамьиятӣ ва сулҳу суббот кору фаъолият доранд. Таьрихи навини давлатдории тоҷикон шоҳиди он аст, ки парчам ва бузургдошти он барои ҳар як сокини кишвар муқаддас буда, бо шарофати ҷилои он мардум бештар муттаҳид ва боиси анҷоми амалҳои нек гашта, ифтихори зиёдеро дар замири худ мепарастанд.

Давлатзода Баҳрулло Раҳмон,

муовини якуми раиси Кумита оид ба таҳсилоти ибтидоӣ

ва миёнаи касбии назди Ҳукумати Ҷумҳурии Тоҷикистон

Имрӯз дар Муассисаи давлатии таълимии “Коллеҷи омӯзгории шаҳри Ҳисор” чорабинии тантанавӣ зери унвони “Парчами миллӣ рамзи осоиштагӣ” бо мақсади арҷ гузоштан ба муқаддасоти миллӣ ва рамзҳои давлатдорӣ баргузор гардид.

Дар чорабинӣ пас аз садо додани Суруди Миллӣ муовини директор оид ба таълим Раънои Камолиддин баромад намуда, ҳозиринро ва дар симои онҳо тамоми мардуми шарафманди диёрро ба муносибати ин ҷашни бузурги миллӣ самимона таҳният гуфта, оид ба таърихи парчам маълумоти мухтасар манзур намуданд.

Сипас, донишҷӯён маърӯза ва барномаи фарҳангии омоданамудаашонро пешкаши ҳозирин гардониданд.

Чист Парчам? – ифтихори миллат аст,

Чист Парчам? – иқтидори миллат аст.

Ҷуз Парчам нест тоҷикро нишон,

Чист Парчам? – эҳтироми миллат аст.

Оре, таърих гувоҳ аст, ки тоҷикон ҳамчун дорои таърихи куҳан ва миллати фарҳангдӯсту ориёӣ аз қадимулаём соҳибпарчам буда, маҳз пайдоиши Парчам аз мо, тоҷикон маншаъ мегирад. Агар ба таърих бо чашми хирад нигарем, дар он садҳо ҷилои ҷилваи муборизаи ҳузнангези мардуми шарафманду сарбаланду ватандӯсту қаҳрамону мондагору таърихии фарзонафарзандони тоҷикро баҳри ҳифзи марзу бум, пос доштани номуси ватандорӣ, ҳифзи арзишҳои таърихию фарҳангии миллиро бо ивази ҷон мебинем, ки боиси ифтихору сарфарозист. Бале, тоҷикон аз қадим дорои чунин ғурури миллӣ ва ватандорӣ ҳастанд ва то имрӯз ин насли асил оини ватандориву мероси гаронбаҳои ниёгони худро гум накарда, онро бо ғурури ватандорӣ идома дода истодаанд. Маҳз, ғуруру номуси Коваи оҳангар – яке аз фарзандони аҷдодони мо, тоҷикон буд, ки бар зидди ҷаҳолат ва зулму ситам матои пешбанди худро ҳамчун Дирафш, ки дар замони ҳозир маънои Парчамро ифода мекунад, истифода бурда, ҳамчун қувваи некӣ бар бадӣ ғалаба кард ва аз он рӯз иборатан он Диравши Коваён ном гирифта, аввалин Парчам ба ҳисоб меравад.

Тазаккур бояд дод, ки маҳз аввалин Парчам, ки баҳри барҳам додани қувваи бадӣ ва нишонаи ғалаба кардан арзи ҳастӣ кардааст, басо рамзист ва воқеан Парчам доштан ин ифтихорманду иқтидорманд будан аст. Парчам ин муқаддасоти миллие мебошад, ки ба воситаи он халқияту миллату давлатҳо дар ҷаҳон муаррифӣ мегарданд. Чунончӣ ҳар як варзишгар, иштирокчии олимпиада ва ё дигар намояндаи давлат ба ягон мусобиқа, олимпиада ва ё ҳамчун намоянда дар сатҳи байналмилалӣ иштирок мекунад, ҳатман бо худ Парчамро мебарад ва ҳангоми ғолибият бо ифтихор онро парафшон мекунад, зеро он яке аз рамзҳои муҳимми давлатӣ ба шумор рафта, муаррифгари давлату миллат ва мояи ифтихори халқ аст. Дар баробари ин, Парчамро боз дар ҳамагуна чорабиниҳои муҳимми давлатӣ, сиёсӣ ва фарҳангии миллӣ низ ҳамчун рамзи эҳтиром ба арзишҳои миллӣ дар пеш мегузоранд, ки ин ҳам аз садоқату ифтихору ғурури ватандорӣ шаҳодат медиҳад.

Ёдовар бояд шуд, ки модари тоҷик чун ҳамеша насли қаҳрамон ба дунё меоварад. Инҷост, ки дар натиҷаи ҷонбозиҳову қаҳрамониҳо ва фидокориҳои фарзонафарзанди миллат, Асосгузори сулҳу ваҳадти миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Иҷлосияи XVI Шурои Олии Ҷумҳурии Тоҷикистон 24-уми ноябри соли 1992 Парчами давлатӣ иборат аз се ранг бо ифодаи мазмунҳои баланд қабул карда шуд, ки то ба имрӯз сари болои мост. Маҳз, бо шарофати Истиқлоли Ватан Парчами давлатии мо бо баландтарин поя дар саросари ҷаҳон дар маркази пойтахти азизамон - Душанбешаҳр қомат афрохт, ки тамоми сокинону сайёҳон ва меҳмононро тасхир намудааст.

Бояд гуфт, ки ҳар фарди бонангу номусро зарур аст, ки шиори “ДАР ХУНИ МАН ҒУРУРИ НИЁГОН НУҲУФТА АСТ”-ро аз они худ намуда, аз ин муқаддасоти миллӣ ифтихор кунад, онро эҳтиёт намояд ва барои абадан парафшонии Парчами азизу зебои Тоҷикистони соҳибистиқлол ҷонашро дареғ надорад, зеро Парчам бахт, ҳастӣ, номусу нанг, ғурур, нур ва сари болои мо аст. Дар ифода ва мазмуни ин гуфтаҳо Шоири халқии Тоҷикистон, шахсияти ватансаро Муҳаммад Ғоиб мегӯяд:

Дар пеши назар чу нур Парчам монед,

То кам нашавад ғурур Парчам монед.

Ташвиши ватандор ба поён нарасад,

Мирам ба даруни гур Парчам монед.

Саидаброр САИДӢ, мудири шуъбаи тарбия ва кор бо ҷавонони Коллеҷи омӯзгории ба номи Хосият Махсумоваи шаҳри Душанбе